Pagina Inicial»Noticia
Parlamentu Nasionál liu husi sesaun plenária ordinária iha loron 17 fulan janeiro tinan 2022, aprova ona Projetu Rezolusaun n.o 84/V(4ª) – aprova áreas temáticas no âmbito do debate do Cidadão, ho 44 votus a favor, 0 kontra no 0 abstensaun.
Deputadu sira mós aprova Jornal Parlamentu Nasionál serie 1-A, n.o 20, de 20 novembro de 2020, e n.o 38, de 25 de janeiro de 2021, ho 44 votus a favor 0 kontra no 0 abstensaun.
Entretantu iha intervensaun diversas, Deputadu sira husu ba Governu atu kombate kazu dengue ne’ebé aumenta makas iha kapitál Díli inklui munisípiu seluk, preokupasaun professor sira-nian kona-ba retroativo no rejime salarial, kaderneta no certificado ba estudante sira inklui asuntu importante sira seluk.
Iha sesaun plenária ne’e, Komisaun G mós aprezenta relatóriu fiskalizasaun ba Munisípiu Manatuto no Bobonaro iha fulan Jullu tinan 2021.
Ministru Asuntu Parlamentares no Komunikasaun Sosiál, Francisco M. Jerónimo, hatete Governu kontinua rezolve kazu dengue ne’ebé aumenta iha kapitál Dili, nune’e iha área hirak ne’ebé identifika risku, Governu kontinua rega susuk no hamoos fo’er sira. Além de ne’e Governu liu husi ministériu relevante sira kontinua esforsu responde preokupasaun hirak ne’ebé Deputadu sira aprezenta.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira no hetan prezensa husi Ministru Asuntu Parlamentares no Komunikasaun Sosiál.
