Pagina Inicial»Noticia
Komisaun Espesializada Permanente sira, hahú husi Komisaun A too Komisaun G iha loron 12 fulan janeiro tinan 2022, halo diskusaun no aprovasaun ba ajenda servisu komisaun ida idak nian hodi bele implementa iha fulan ida-ne’e.
Komisaun A além de halo diskusaun ba ajenda inisiativa lejizlativa sira ne’ebé pendente iha 2021, halo mós audiénsia ho ekipa Rede Ba Rai hodi rona preokupasaun sira husi ekipa refere.
Komisaun B halo diskusaun ba atividade hirak ne’ebé sei realiza iha fulan janeiro laran ho nia prioridade sira.
Komisaun C halo aprovasaun ba redasaun final ba Lei Enkuadramentu Orsamentál no apresiasaun no aprovasaun Konta Jerál Estadu 2020 nian.
Komisaun D alem de diskusaun ba kalendáriu atividade 2022 nian halo mós aprovasaun ba ata reuniaun anterior sira inklui aprovasaun relatóriu vizita fiskalizasaun ba munisípiu Liquiçá.
Komisaun E halo apresiasaun ba planu vizita fiskalizasaun, aprovasaun ata reuniaun anterior inklui apresiasaun planu fiskalizasaun konjuntu ba projetu 44 iha munisípiu Lautém, Baucau, Viqueque, Manatuto, Ermera, Liquiçá, Bobonaro no Covalima.
Komisaun F halo reuniaun avaliasaun ba inisiativa lejizlativa sira 2021 nian hodi bele deside prioridade sira komisaun nian.
Komisaun G halo deliberasaun kona-ba fiskalizasaun ba ezekusaun fundu infraestrutura edukativa tinan fiskál 2021 nian iha Munisípiu Lautem, Viqueque, Baucau no Manatuto.
