Pagina Inicial»Noticia
Parlamentu Nasionál iha sesaun plenária ordinária iha loron 11 fulan janeiro tinan 2022, liu husi eleisaun sekreta hili ona Deputada Carmelita Caetano Moniz (efetivo) no Ivo Valente (suplente), hodi reprezenta Parlamentu Nasionál ba Konsellu Superior Magistratura Judisiál.
Sesaun plenária ne’e mós baixa ba Komisaun B Proposta Rezolusaun n.o 7/V(4ª) – Ratifica, para adesão, a Convenção Internacional para a Salvaguarda da Vida Humana no Mar de 1974 e o respetivo Protocolo de 1978.
Entretantu iha intervensaun diversa, Deputadu sira preokupa kona-ba kondisaun estrada liuliu estrada hirak ne’ebé halo ligasaun husi munisípiu ba posto administrativo sira ne’ebé maioria aat ona, jestaun lixo iha kapitál Díli, kazu dengue ne’ebé rejista makas iha kapitál Díli, eletrisidade iha suku balun seidauk asesu inklui preokupasaun sira seluk.
Ministru Asuntu Parlamentares no Komunikasaun Sosiál hatete Governu liu husi ministériu relevante sira kontinua esforsu hodi responde preokupasaun komunidade sira-nian liuliu hirak ne’ebé konsidera urjénsia.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira no hetan prezensa husi Ministru Asuntu Parlamentares no Komunikasaun Sosiál.
