Pagina Inicial»Noticia
Parlamentu Nasionál iha loron 3 fulan dezembro tinan 2021, aprova ona Proposta Orsamentu Jeral Estadu 2022 nian ho total $ 1.675.000.000,00 iha Jeneralidade ho 44 votus a favor, 0 kontra no 21 Abstensaun.
Diskusaun ba jeneralidade ne’e lao durante loron tolu hahú iha loron 1 too 3 fulan dezembro tinan 2021, ne’ebe prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira no hetan Prezensa husi Primeiru-Ministru, Taur Matan Ruak ho membru Governu sira.
Durante diskusaun, Deputadu sira aprezenta preokupasaun barak liga ba orsamentu no kondisaun infraestrutura no ekonomia Timor-Leste nian. Preokupasaun hirak ne’e hetan kedas resposta husi Primeiru-Ministru ho membru Governu sira.
Hafoin ida-ne’e kada bankada parlamentar sira halo intervensaun ne’ebe koalia kona-ba estrutura, prinsipiu no medida sira orsamentu 2022 ho pojisaun bankada nian ba planu no programa Governu nian.
Ho aprovasaun jeneralidade ne’e, Parlamentu Nasionál sei kontinua diskusaun no aprovasaun ba espesialidade iha loron 6 fulan dezembro tinan 2021.
