Pagina Inicial»Noticia
Prezidente Parlamentu Nasionál, Aniceto Longuinhos Guterres Lopes, akompaña husi Deputadu sira partisipa iha serimonia selebrasaun 46º Proklamasaun Indepedensia iha Munisipiu Baucau, iha loron 28 fulan novembro tinan 2021.
Serimonia ne’ebe prezide husi Prezidente Repúblika, Francisco Guterres «Lu-Olo» ne’e hetan partisipasaun maximu husi orgaun soberanu sira, veteranu sira, komunidade sira no konvidadu sira seluk.
Iha serimonia refere, kondekora mós timoroan hirak ne’ebe fó kontribuisaun ba luta libertasaun nasionál inklui fó mós indultu ba prizoneiru balun ne’ebe durante ne’e kumpri ona pena prizaun.
Komemorasaun Proklamasaun Independensia ne’e iha serimonia hatún Bandeira Nasionál prezide husi Prezidente Parlamentu Nasionál no kontinua kedas ba fahe premiu ba manán nain sira husi jogu hirak ne’ebe promove husi komisaun organizadora.
Antes komemora loron proklamasaun ne’e, iha loron 27 selebra uluk misa agradesimentu iha Katedral Baucau ne’ebe prezide husi Administrador Dioseze Baucau Pe Alípio Pinto Gusmão no iha parte kalan halo jantar konfraternizasaun ho veteranu sira ne’ebe hetan kondekorasaun, no kontinua ba vizita fatin expozisaun ne’ebe Parlamentu Nasionál rasik mós partisipa iha eventu refere.
