Parlamentu Nasionál iha sesaun plenária, iha loron 12 fulan outubro tinan 2021, hili ona Bendito dos Santos Freitas, hodi substitui saudozu Eduardo de Deus Barreto «Dusae», iha Konsellu Estadu, ho 58 votu a favor, 0 kontra no 2 abstensaun.
Sesaun plenária ne’e mós halo aprovasaun iha jeneralidade ba Proposta Lei no 20/V(2ª) – alterasaun dahuluk ba Lei no 10/2004, loron 24 fulan novembru kona-ba Lei Sistema Saude, ho 37 a favor, 2 kontra no 3 abstensaun.
Durante sesaun plenária ne’e Grupo Feto Parlamentar organiza hamutuk ho Plan Internacional fasilita estudante Rosalina Bianco Alves sai hanesan Prezidente Grupo Feto Parlamentar (GMPTL) durante minutu balun nia laran hodi asisti lala’ok diskusaun iha sala plenária.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira.
