Pagina Inicial»Noticia
Parlamentu Nasionál liu husi sesaun plenária ordinária iha loron 5 fulan outubru tinan 2021, halo debate ho Ministeriu Finansas kona-ba Segimentasaun Fundu Petroliferu.
Debate ne’ebe hetan prezensa husi Ministru Finansas, Rui Augusto Gomes, ho nia ekipa ne’e hahú ho aprezentasaun relatóriu no pareser husi Komisaun C ne’ebe trata asuntu Finansas Públikas.
Hafoin aprezentasaun relatóriu no pareser, Ministru Finansas fó resposta no pozisaun Governu nian ba relatóriu refere, liga ba lei fundu petroliferu.
Iha período antes ordem do dia nian, Komisaun G ne’ebe trata asuntu Edukasaun, Juventude, Kultura no Sidadania, aprezenta relatóriu fiskalizasaun ba Munisipiu Aileu, iha fulan juñu liu ba.
Sorin seluk, Bankada Parlamentar FRETILIN, liu husi nia Xefe Bankada Deputadu Francisco Franco, hato’o deklarasaun politika kona-ba andamentu Projetu Lei Cyber Crime, liga ba publikasaun informasaun falsa no akuzasaun oioin iha rede sosial sira.
Entretantu iha intervensaun diversa nian, Deputadu sira hato’o preokupasaun sira kona-ba kontrolu husi autoridade regulador sira ba operador telekomunikasaun sira iha Timor-Leste, tanba hamosu preokupasaun husi kliente sira, estrada barak iha munisipiu sira kontinua aat, falta bee-moos ba komunidade sira, konsumedor eletrisidade barak kontinua halo ligasaun ilegal no seluk tan.
Deputadu sira mós kontinua halo diskusaun iha espesialidade ba Orsamentu Privativu Parlamentu Nasionál ba 2022 nian.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru sira Meza nian.
