Pagina Inicial»Noticia
Komisaun C iha Parlamentu Nasionál ne’ebe trata asuntu Finansas Públikas halo audiénsia ho Sekretáriu-Jerál Parlamentu Nasionál, Adelino Afonso de Jesus, ho nia ekipa iha loron 22 fulan setembru tinan 2021, iha sala konferénsia.
Audiénsia ne’e ho objetivu atu diskute kona-ba Orsamentu Privativo Parlamentu Nasionál ba tinan 2022, ne’ebe elabora husi Sekretariadu-Jeral no hetan ona aprovasaun husi Konsellu Administrasaun Parlamentu Nasionál.
Hafoin audiénsia, Komisaun C sei prepara relatóriu no pareser hodi aprezenta ba plenária atu hetan aprovasaun antes entrega ba Governu hodi engloba iha Orsamentu Jeral Estadu 2022 nian.
Iha loron hanesan Komisaun D ne’ebe trata asuntu Ekonomia no Dezenvolvimentu mós halo reuniaun komisaun nian hodi diskute kona-ba ajenda vizita fiskalizasaun nian no asuntu sira seluk.
Entretantu Komisaun F ne’ebe trata asuntu Saude, Seguransa Sosial no Igualdade Jeneru, halo vizita fiskalizasaun ba Hospital Nasionál Guido Valadares (HNGV) hodi haree kondisaun no observa servisu balun liga ba atendimentu publiku iha hospital refere.
