Pagina Inicial»Noticia
Parlamentu Nasionál iha plenária ordinária loron 21 fulan setembru tinan 2021, aprova ona iha final global ba Projetu Lei n.o 5/V(2ª) – Lei Eleitoral Munisipal, ho 48 votu a favor, 0 kontra no 4 abstensaun no Projetu Lei n.o 6/V (2ª) – Lei Poder Lokal no Desentralizasaun Administrativa, ho 53 votu a favor, 0 kontra no 0 abstensaun.
Aprovasaun projetu lei sira ne’e hetan prezensa husi Ministru Administrasaun Estatal, Miguel Pereira de Carvalho, ne’ebe hahú ho leitura ba relatóriu pareser husi Komisaun A ne’ebe aprezenta husi relator Vise-Prezidente Komisaun A, Deputadu Francisco de Vasconcelos.
Entretantu iha intervensaun Deputadu sira-nian, aprezenta kona-ba atendimentu no nível salarial ne’ebe la hanesan iha EDTL; funsionáriu balun m ate ona maibé naran kontinua mosu iha lista liña frente nian; distribusaun cesta básica ne’ebe too agora família balun seidauk simu; Oecússi no Ataúro enfrenta difikuldade ba transporte maritima; lei komplementar ba Lei Nain Ba Rai hodi bele rezolve problema rai iha teritoriu nasionál no asuntu importante sira seluk.
Ministru Asuntu Parlamentares no Komunikasaun Sosial, Francisco Martins da Costa Pereira Jerónimo, hatete Governu selu ona empreza hirak ne’ebe durante ne’e halo distribuisaun ba cesta básica no kontinua rezolve ba família hirak ne’ebe seidauk simu, enkuantu asuntu sira seluk sei informa ba ministériu relevante hodi rezolve.
Sesaun Plenaria ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira no hetan prezensa husi Ministru Asuntu Parlamentares no Komunikasaun Sosial, Francisco Martins da Costa Pereira Jerónimo no Ministru Administrasaun Estatal, Miguel Pereira de Carvalho.
