Pagina Inicial»Noticia
Hafoin Parlamentu Nasionál halo abertura ba IV Sesaun Lejislativa iha V Lejislatura iha loron 15 horisehik, ohin loron 16 fulan setembru tinan 2021, Komisaun Espesializada sira hahú ona halo reuniaun dahuluk hodi halo apresiasaun no aprovasaun ba kalendariu servisu no aprovasaun ata anterior inklui ajenda servisu sira seluk.
Komisaun A ne’ebe trata asuntu Konstitusionais no Justisa, lidera husi Prezidente Komisaun, Deputadu Joaquim dos Santos «Boraluli», iha reuniaun dahuluk ne’e halo apresiasaun no aprovasaun ba textu final ba diskusaun espesialidade Projetu Lei n.o 6 / V (2a) - Lei Poder Lokal no Desentralizasaun Administrativa; Apresiasaun no aprovasaun relatóriu no textu final ba diskusaun iha espesialidade ba Projetu Lei n.o 5 / V (2a) - Lei Eleitoral Munisipal; Apresiasaun no aprovasaun relatóriu no textu final ba diskusaun iha espesialidade ba Projetu Lei n.o 28 / V (3a) – Lei Organizasaun Judisiária; Apresiasaun no aprovasaun ba relatóriu no textu final ba diskusaun iha espesialidade ba Projetu Lei n.o 21 / V (3a) - Estatutu Majistradu Judisiais.
Komisaun C ne’ebe trata asuntu Finansas Públikas ne’ebe lidera husi Prezidente Komisaun Deputada Maria Angelica Rangel dos Reis, halo apresiasaun ba proposta Orsamentu Privativu Parlamentu Nasionál 2022 nian.
Komisaun D ne’ebe trata asuntu Ekonómia no Dezenvolvimentu ne’ebe lidera husi Prezidente Komisaun, Deputadu Antoninho Bianco, halo diskusaun aprovasaun ata reuniaun anterior; Apresiasaun ba planu atividade komisaun nian ba IV Sesaun Lejislativa; Apresiasaun no aprovasaun relatóriu atividade iha III Sesaun Lejislativu nian.
Komisaun E ne’ebe trata asuntu Infraestruturas, lidera husi Prezidente Komisaun, Abel Pires da Silva, halo udiénsia públika ho Xefe Suku Guiço no Xefe Suku Lisadila; Audiénsia públika ho empreza lokal sira; Apresiasaun ba keisa ne’ebe aprezenta husi empreza King Construção; Deliberasaun ba planu fiskalizasaun ba Munisípiu Bobonaro no Covalima; Apresiasaun no aprovasaun relatóriu vizita fiskalizasaun ba Munisípiu Ermera, Manatuto no Ainaro; Aprovasaun ba ata sira reuniaun anterior.
Komisaun F ne’ebe trata asuntu Saúde, Seguransa Sosial no Igualdade Jeneru, lidera husi Prezidente Komisaun, Deputadu Noé da Silva Ximenes “Buka Tuir” halo deliberasaun ba atividade sira komisaun nian; Aprezentasaun ba aplikasaun zoom husi UNICEF.
Komisaun G ne’ebe trata asuntu Edukasaun, Joventude, Kultura no Sidadania, lidera husi Prezidente Komisaun, Deputadu Antonio Verdial Sousa, halo deliberasaun ba planu fiskalizasaun ba Munisípiu Baucau no Manufahi; Apresiasaun no aprovasaun relatóriu vizita fiskalizasaun ba munisípiu Aileu, Manatuto no Bobonaro.
