Pagina Inicial»Noticia
Prezidente Parlamentu Nasionál, Aniceto Longuinhos Guterres Lopes, akompaña husi Vise-Prezidente, Luis Roberto da Silva, no Deputadu Antonio da Conceição, hafoin fila husi Konferénsia Mundial iha Áustria, iha loron 11 fulan setembru tinan 2021, halo reuniaun ho komunidade timoroan no estudante sira ne’ebe hala’o hela estudu iha Portugal.
Reuniaun ne’ebe akompaña husi adidu militar Timor-Leste iha Portugal no reprezentante Embaixada Timor-Leste iha Portugal ne’e esplika kona-ba situasaun Timor-Leste iha pandemia Covid-19 ne’e.
Prezidente Parlamentu Nasionál enkoraza estudante sira atu estuda didi’ak no husu mós ba komunidade timoroan sira iha Portugal atu kontinua apoia no kontribui ba prosesu dezenvolvimentu Timor-Leste.
Estudante no komunidade timoroan sira mós aprezenta preokupasaun balun ba Prezidente Parlamentu Nasionál ho nia delegasaun liuliu kona-ba dokumentu balun hodi fasilita prosesu estudu.
Prezidente Parlamentu Nasionál ho nia delegasaun mós simu konvite husi Sekretáriadu g7+ iha Portugal hodi haree diretamente kondisaun servisu no halo reuniaun ho ekipa servisu iha sekretáriadu refere.
Durante reuniaun, Prezidente Parlamentu Nasionál husu atu kontinua servisu no mobiliza solidaridade internasionál hodi kontribui ba dezenvolvimentu no kombate Covid-19 iha Timor-Leste.
Sekretáriu-Jeral g7+, Hélder da Costa, agradese ba vizita husi delegasaun Prezidente Parlamentu Nasionál no promete kontinua servisu tuir politika no programa Estadu Timor-Leste nian, liuliu hamutuk ho nasaun membru sira hodi kria paz no estabilidade iha mundu.
