Pagina Inicial»Noticia
Parlamentu Nasionál liu husi Sesaun Plenária extraordinária, iha loron 24 fulan agosto tinan 2021, autoriza Prezidente Repúblika, Francisco Guterres “Lu-Olo”, hodi dekreta Estadu Emerjénsia ba dala 17º iha teritóriu nasionál ho durasaun loron 30, hahú iha loron 31 fulan agosto too loron 29 fulan setembro tinan 2021.
Pedidu autorizasaun ne’e bazeia ba kazu Covid-19 ho nia variante foun ne’ebe kontinua aumenta iha munisipiu sira liuliu kapital Díli.
Primeiru-Ministru, Taur Matan Ruak, iha nia intervenção hatete Governu fó sai ona medida foun hodi kombate variante foun vírus ida-ne’e, ho nia prevensaun sira ne’ebe durante ne’e implementa hela.
Iha nasaun barak retoma fali ona implementasaun medida sira ho urjente no rigor hodi kombate vírus no too nasaun balun hahu doze datoluk ba vasina.
Tanba ne’e Timor-Leste presija medidas sira forte ho implementasaun vasina hodi kobre maioria populasaun liuliu vulnerável sira.
Deputadu sira kontinua sujere ba Governu atu firme no rigor iha implementasaun medida prevensaun sira no kontrolu fronteira terrestre.
Husi diskusaun naruk, Deputadu sira autoriza deklarasaun Estadu Emerjensia liu husi votasaun 38 votu a favor, 0 kontra no 16 abstensaun.
Entretantu iha parte loraik, Deputadu sira halo apresiasaun foun ho 43 votu a favor, 0 kontra no 0 abstensaun ba Dekretu Parlamentu Nasionál n.o 43/V – Alterasaun dahuluk ba Lei n.o 6/2016 loron 26 fulan maiu, Lei Resensiamentu Eleitoral.
Sesaun Plenaria ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membro Meza sira no hetan prezensa husi Primeiru-Ministru no membru Governu sira seluk.
