Pagina Inicial»Noticia
Parlamentu Nasionál liu husi reuniaun plenária Komisaun Permanente iha loron 17 fulan agosto tinan 2021, kontinua alerta ba Governu liuliu Ministériu Saúde atu kombate no minimiza infesaun Covid-19 iha Timor-Leste.
Deputadu sira sujere atu kontinua implementa medida sira prevensaun nian inklui vasinasaun iha teritoriu tomak. Numeru Covid-19 ho nia variante foun Delta ne’ebe hahu ona rejista iha Timor-Leste, kontinua aumenta maske sidadaun barak vasina ona.
Iha intervensaun diversa ne’e, Deputado sira mós husu ba Governu atu rezolve preokupasaun populasaun sira-nian hanesan estrada, bee-moos, eletrisidade inklui subsidiu ba liña frente sira.
Reuniaun Plenaria Komisaun Permanente ne’e mós aprova ho unanimidade ba Projetu Deliberasaun n.o 4/V(3ª) - promove konvokasaun Parlamentu Nasionál atu realiza reuniaun plenária extraordinária hodi halo apresiasaun foun ba Dekretu Parlamentu Nasionál kona-ba lei resensiamentu eleitoral.
Sekretáriu Estadu Komunikasaun Sosial, Merício Juvinal dos Reis “Akara” hatete preokupasaun hirak ne’ebe Deputadu sira aprezenta, Governu rezolve ona buat balun, no balun iha ona prosesu hodi rezolve liuliu hanesan estrada no eletrisidade.
Entretantu kona-ba prevensaun no kombate Covid-19, Governu ho entidade relevante sira liuliu Ministériu Saúde no ekipa liña frente kontinua esforsu hodi implementa no assegura medida prevensaun sira no aselera vasina iha teritoriu tomak.
Sesaun Plenária ne’e Prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza Komisaun Permanente nian no hetan prezensa husi Sekretáriu Estadu Komunikasaun Sosial, Merício Juvinal dos Reis Akara.
