Pagina Inicial»Noticia
Parlamentu Nasionál liu husi Komisaun A ne’ebe trata asuntu Konstitusionais no Justisa, finaliza ona diskusaun iha espesialidade ba Projetu Lei Estatutu Majistradus Judisiais ho total 179 artigu.
Diskusaun ne’ebe la’o durante loron 4 hahú iha loron 03 too 09 fulan agosto tinan 2021, ne’e diskuti liu kona-ba direitu no dever juiz sira inklui nia regalias.
Membru Komisaun A, Deputada Carmelita Caetano Moniz, hatete projetu lei refere regula mós kona-ba orgaun Konsellu Superior Majistratura Judisiais ne’ebe sei kontrola servisu juiz sira.
Agora daudaun seidauk iha Tribunal Superior Administrativo Fiskal no Kontas, maibe Lei Oganizasaun Judisiariu estabelese ona Tribunál Supremu Administrativu Fiskal no Kontas nune’e rekursu kontensioju administrativu sira lori ba Tribunál Supremu Administrativu Fiskal no Kontas, mesmo desizaun mai husi Konsellu Superior Majistratura Judisiais.
Durante diskusaun, maske mosu diferensia opiniaun maibé ho kontribuisaun ideia husi setor judisiariu sira bele hetan konkluzaun.
Hafoin diskusaun iha espesialidade, Komisaun A sei halo relatoriu no pareser antes aprezenta ba plenaria hodi hetan aprovasaun final global.
