Parlamentu Nasionál liu husi Komisaun A ne’ebe trata asuntu Konstitusionais no Justisa, halo ona diskusaun iha espesialidade ba Projetu Lei Estatutu Majistradus Judisiais ho total 179 artigu.
Husi diskusaun ne’ebe lao durante loron 4 hahú iha loron 27 too 30 fulan jullu tinan 2021, ne’e aprova ona artigu hamutuk 40.
Projetu Lei ne’e ho objetivu ida mós atu halo ajustamentu ba Lei Organizasaun Judisiario ne’ebe komisaun finaliza ona no hein aprovasaun final global iha Plenaria Parlamentu Nasionál.
Alem de ne’e, projetu lei refere tama iha matéria reforma lejislativu nian tanba tinan rua-nulu resin ona sistema judisiariu bazeia nafatin ho regulamentu UNTAET (Administrasaun Tranzitoria Nasoes Unidas iha Timor-Leste) nian.
Prezidente Komisaun A, Deputadu Joaquim dos Santos «Boraluli», iha diskusaun ne’ebe realiza iha Munisipiu Manufahi, hatete, durante diskusaun komisaun konsidera opiniaun hotu husi entidade judisiariu sira liuliu Ministériu Públiku, Defensoria Públika, Advogado sira no Konsellu Superior Majistradus Judisiais, hodi hamossu lei ida ne’ebe reprezenta duni setor justisa.
Ho artigu balun ne’ebe seidauk hetan aprovasaun, Komisaun A ho antidade judisiáriu sira sei kontinua halo diskusaun iha semana ne’e hodi finaliza antes aprezenta iha Plenária.
