Pagina Inicial»Noticia
Prezidente Parlamentu Nasionál, Aniceto Longuinhos Guterres Lopes, partisipa iha Reuniaun Parseiru Dezenvolvimentu Timor-Leste (RPDTL), iha Ministériu Finansas Aitarak-laran Díli, iha loron 30 fulan jullu tinan 2021.
Reuniaun RPDTL ne’ebé loke husi Primeiru-Ministru, Taur Matan Ruak, ne’e hetan prezensa husi Eis-Primeiru-Ministru, Mari Alkatiri, parseiru internasionál sira, embaixadór sira, setor privadu, sosiedade sivil,membru Governu tomak, inklui konvidadu sira seluk.
Tema ba reuniaun RPDTL mak Moving Beyond Crisis: Building Back Better for Inclusive Development and Recovery.
Iha diskursu abertura ba reuniaun refere, Primeiru-Ministru ko’alia kona-ba prosesu dezenvolvimentu Timor-Leste ho nia dezafiu sira liuliu iha períodu pandemia Covid-19 no kalamidade públika ne’ebe akontese iha fulan hirak liu ba. Ho vasinasaun ne’ebe lao daudaun bele loke fila fali siklu esperansa ba nasaun maibé importante tebes ba nasaun hodi halo reforma ba asuntu estratejiku sira no hamutuk reduz kiak iha Timor-Leste.
Iha Orsamentu Jerál Estadu ba tinan oin, sei fó prioridade ba setor estratejiku sira ho modelu foun no transforma konjuntura ba oportunidade ida loos.
Entretantu Ministru Finansas, Rui Augusto Gomes, iha nia diskursu ko’alia kona-ba planifikasaun orsamental hodi responde ba nesessidade nasaun tuir planu no programa.
Timor-Leste enfrenta situasaun defisil la’os de’it Covid-19 ne’ebe nasaun tomak iha mundu enfrenta maibé ho kalamidade públika ne’ebe akontese iha fulan hirak liu ba.
Tanba ne’e Governu kontinua hametin kooperasaun ho parseiru internasional sira hodi responde ba nesessidade no defikuldade ne’ebe mak iha.
