Pagina Inicial»Noticia
Prezidente Parlamentu Nasionál, Aniceto Longuinhos Guterres Lopes, dezeja susesu ba embaixadór foun sira ne’ebe hetan konfiansa husi Estadu hodi hala’o knaar iha estranjeiru.
Iha loron 29 fulan jullu tinan 2021, Prezidente Parlamentu Nasionál simu audiénsia husi embaixadór foun sira hanesan Embaixadór ba Cuba, Eusébio Corsino; Nasoes Unidas, Karlito Nunes; Nova Zelândia, Felicidade Guterres no Enviadu Espesial ho kategoria Embaixadór Itenerante ba Asuntu Klimatika, Adão Soares Barbosa, iha gabinete Prezidente nian.
Durante audiénsia, Embaixadór sira aprezenta ba Prezidente Parlamentu Nasional kona-ba plano no programa hirak ne’ebe Embaixadór sira sei hala’o iha nasaun hirak ne’ebe haknaar ba.
Embaixadór sira mós husu apoiu moral no politiku husi Parlamentu Nasionál hodi hala’o knaar ho responsabilidade tuir politika Estadu Timor nian.
Prezidente Parlamentu Nasionál husu ba embaixadór sira atu mobiliza solidariedade mai Timor-Leste no alarga tan kooperasaun sira.
Sorin seluk, Prezidente Parlamentu Nasionál mós husu atu embaixador sira proativu liu tan no kreatividade hodi tulun dezenvolvimentu nasaun nian.
