Pagina Inicial»Noticia
Parlamentu Nasionál liu husi Komisaun A ne’ebe trata asuntu Konstituisional no Justisa, finaliza ona diskusaun iha espesialidade ba Proposta Lei nº 28/(3ª) Organizasaun no Funsionamentu Tribunal sira. Diskusaun ne’e realiza entre loron 15 to’o 17 fulan jullu tinan 2021, iha Salaun Mukit Aisirimou, Município Aileu.
Hafoin termina diskusaun, Prezidente Komisaun A ba média Parlamentu Nasionál nian hatete, Deputadu sira konsege finaliza ona diskusaun ba Proposta Lei Organizasaun Judisiariu. Iha inisiativa rua, ida husi Deputadu sira mak Projetu Lei, ida fali mai husi Governu mak Proposta Lei, Plenáriu Parlamentu Nasionál aprova estrutura rua ne’e hotu, entaun, iha diskusaun espesialidade ne’e presiza halo estrutura ketak ida hodi bele sai referensia hodi halo diskusaun artigu ba artigu, ho ida-ne’e, Komisaun A halo konsensu ida hodi elemina tiha Projetu de Lei, no halo deit diskusaun ba Proposta Lei husi Governu nian ho total 85 artigo, no Governu marka prezensa hodi defende sira nia proposta. Durante diskusaun, proposta barak foti husi Projetu Lei hodi kontribui ba proposta husi governu no Deputadu sira aprova ona iha espesialidade.
Durante diskusaun ba Proposta Lei ne’e, Deputadu sira konsege revoga regulamentu UNTAET numeru 11/2002, ne’ebé mak harii Tribunal primeira instansia ha’at (4), Tribunal Rekursu ida hanesan konstituisaun fó dalan hodi funsiona hanesan Tribunal Instansia máxima hanesan Supremo Tribunal.
Iha diskusaun ne’e, iha konkordansia hodi harii Tribunal Supremu ho Juis nain hitu (7) juis de kareira nian 4, depois sei halo rekrutamentu pur mérito ba juis nain tolu (3) tan hodi kompleta nain hitu (7) hodi servisu iha Tribunal Supremu. Alén ne’e, konkorda mós hodi tau juis nain sia (9) iha Tribunal Rekursu, hodi hala’o nia knar ba julgamentu ba matéria de faktu, matéria de direito ho matéria penal.
Iha diskusaun ne’e Deputadu sira konkorda katak ho tinan rua (2) kuando lei ne’e tama iha vigor tenki hahu ona instala Tribunal Supremu. Iha diskusaun ne’e mós kria regulamento ou kriteria oinsa atu ba servisu iha Tribunal Supremu ho Tribunal Rekursu.
Diskusaun entre Deputadu nomos entidade sira konkorda atu hari Tribunal Primeiro Instansia, Tribunal sia (9) iha 13 Município atu nune bele fasilita povu sira nebe mak presisa justiça, no Governu kompremetidu kada tinan ida sei harii tribunal tolu.
Relatóriu no parecer ba Lei Organizasaun no Funsionamentu Tribunal sira, Deputadu sira Komisaun A nian aprova ona, iha loron 23 fulan jullu tinan 2021. No sei apresenta ba diskusaun no aprovasaun final global tuir kalendáriu ne’ebé determina.
Diskusaun espesialidade ne’e prezide husi Presidente Komissaun A, Deputado Joaquim dos Santos «Boraluli», akompaña husi Deputadu sira Komisaun nian, konta mos ho prezensa husi Ministru Justisa nian, Presidente Tribunal Rekursu, Adjuntu Ministériu Publiku, Defensoria Públika no entidades importante sira seluk.
