Pagina Inicial»Noticia
Global Organization of Parliamentarians Against Corruption (GOPAC), iha loron 20 fulan jullu tinan 2021, halo serinomia ba restruturasaun membru diretivu periodu 2021-2023, iha Parlamentu Nasional.
Iha serimonia refere, Prezidente Komite Ezekutivu GOPAC TL sesante, Deputadu Francisco Miranda Branco, aprezenta relatório servisu durante nia mandatu ho dezafiu sira.
Prezidente GOPAC mos explika kona-ba existensia GOPAC nu’udar organizasaun mundial parlamentar luta kontra korupsaun ne’ebe forma husi lejislador sira.
Prezidente Konsellu Administrasaun GOPAC TL sesante, Deputadu Aderito Hugo da Costa, hatete GOPAC hanesan orgaun ida ne’ebe estabelese nia sekretariadu iha resintu Parlamentu Nasional, no durante ne’e hetan finansiamentu husi Parlamentu Nasional inklui nia parseiru sira.
Durante ne’e GOPAC halo sensibilizasaun kona-ba kombate korupsaun iha Timor-Leste, no iha efetividade servisu maske iha dificuldade barak.
Entretantu Prezidente Parlamentu Nasional, Aniceto Longuinhos Guterres Lopes, iha nia diskursu hatete GOPAC iha nia papel no funsaun ne’ebe importante tebes tanba envolve husi eis Deputadu sira inklui Deputadu sira ne’ebe efetivu nu’udar lejislador no fiskalizador.
Prezidente Parlamentu Nasional mos husu atu redefini papel no funsionamentu membru sira nian nu’udar rede anti korupsaun global, ne’ebe halibur membru parlamentar sira. Rekonhese mos kontribuisaun GOPAC iha elaborasaun too final ba Lei Prevensaun no Kombate Korupsaun.
Presidente foun GOPAC ba períodu oin mai mak hanesan; Prezidente Konsellu Administrasaun GOPAC, Deputadu Adriano do Nascimento.
