Parlamentu Nasionál liu husi sesaun plenária extraordinária iha loron 14 fulan jullu tinan 2021, Deputadu sira halo eleisaun ba membru nain tolu no-mos Presidente ba Komisaun Nasionál Eleisaun (CNE).
Kandidatu sira ne’ebé apresenta husi Bankada Parlamentar sira mak hanesan; husi Bankada FRETILIN, CNRT no PLP apresenta naran mak, Señor Alcino de Araújo Báris, Señor José Agostinho da Costa Belo no Señora Odete Maria Belo; Bankada PD apresenta Señor José Pedro Mariano Neves de Camões; Bankada KHUNTO apresenta Señor Querubin Jong Ferreira; Bankada FM apresenta Señora Fátima Sarmento Ximenes no Bankada UDT apresenta Señor Octavio Manuel da Costa Amaral.
Husi lista kandidatura ne’ebé apresenta, Deputadu sira halo eleisaun ba membru efetivu nain tolu, ho 61 votos a favor, 1 kontra no 1 abstensaun, membru sira mak hanesan; Alcino de Araújo Barris, José Agostinho Belo no Odete Maria Belo no membru suplemente sira mak hanesan, José Pedro Mariano Neves de Camões, ho 39 votos, Fernanda de Fátima Sarmento Ximenes, ho 35 votus no Querubin Jong Ferreira, ho 33 votos, enkuantu, kandidatura ne’ebé la eleito Octávio Manuel da Costa Amaral, ho resultado votasaun 26 votus.
Hafoin de eleisaun ba representante membru efetivu no suplente, Deputadu sira kontinua halo eleisaun ba Presidente CNE. Lista kandidatura mak hanesan, Bankada FRETILIN kandidata Alcino de Araújo Barris, no Bankada PLP kandidata José Agustinho Belo. Husi lista rua ne’e, eleitu ba Presidente CNE, José Agostinho Belo, ho 35 votus, enkuantu Kandidatu husi Bankada FRETILIN, ho 29 votus.
Sessão Plenária loron ohin nian, hanesan plenária ikus ba 3ª Sesaun Legislativa ba V Lejislatura nian, tanba hahu 15 jullu tama ba recesu parlamentar to’o loron 14 setembru. Mesmu hanesan ne’e, Parlamentu sei funsiona nafatin ho Komisaun Permanente ne’ebé konstitui ona.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes no akompaña husi membru Meza sira.
