Pagina Inicial»Noticia
Parlamentu Nasionál liu husi sesaun plenária iha loron 13 fulan jullu tinan 2021, Deputadu sira kontinua halo diskusaun no aprovasaun ba Projetu Deliberasaun nº 1/V(3ª) – ne’ebe aprova alterasaun daruak ba deliberasaun Parlamentu Nasionál nº 3/2018, loron 27 fulan juñu, kona-ba Konstituisaun Komisaun Permanente, ho 51 votu a favor, 0 kontra no 8 abstensaun; Projetu Deliberasaun nº 2/V(3ª), kona-ba funsionamentu komisaun sira-nian ho 49 votu a favor, 2 kontra no 8 abstensaun; ho diskusaun no votasaun iha jeneralidade Projetu Lei nº 5/V(2ª) – Lei Eleitoral Munisipal no Projetu Lei nº 6/V(2ª) – Lei Poder Lokal no Desentralizasaun Administrativa.
Konstituisaun Komisaun Permanente ne’ebé sei funsiona iha tempu resesu Parlamentar ba legislativa ida-ne’e, ho total Deputadu 32 inklui ona Prezidente no Vise-Prezidente Parlamentu Nasionál nain rua. Loron dahuluk reuniaun komisaun permanente sei realiza iha loron 20 fulan jullu tinan 2021, hodi hili Sekretáriu Meza nomos asuntu sira seluk inklui kalendáriu reuniaun nian. Kona-ba funsionamentu komisaun nian iha tempu resesu ne’e, liga direita ba komisaun sira ne’ebé mak sei iha inisiativa legislativa hodi halo diskusaun mak hanesan Komisaun A, C, D no F.
Projetu Lei nº 5/V(2ª) – Lei Eleitoral Munisipal no Projetu Lei nº 6/V(2ª) – Lei Poder Lokal no Desentralizasaun Administrativa, Deputadu sira aprova iha generalidade, ho votu ne’ebe hanesan, 61 votu a favor, 0 kontra no 0 abstensaun.
Hafoin aprovasaun iha jeneralidade, plenária autoriza diskusaun espesialidade ba Komisaun A ne’ebé trata asuntu Konstitusionais no Justisa ho 60 votu a favor, 0 kontra no 0 abstensaun.
Partisipa iha diskusaun ne’e, Ministru no Vise-Ministru Administrasaun Estatal, hodi fó resposta ba kestaun sira ne’ebé levanta husi Deputadu sira liga ho Projetu lei refere.
Iha sesaun plenária ne’e, Deputadu sira halo mós diskusaun no votasaun ba votu sira mak hanesan votu kongratulasaun ba designasaun Dr. Zacarias Albano da Costa hanesan Sekretáriu Exekutivu ba CPLP, ho votu 53 a favor, 0 kontra no 0 Abstensaun; votu saudasaun ba aniversáriu CPLP ba dala-25, ho votu 53 a favor, 0 kontra no 0 Abstensaun; nomos votu pezar ba matebian Carmel Budiardjo, ho votu 51 a favor, 0 kontra no 0 Abstensaun.
Bankada Parlamentar KHUNTO, reprezenta husi Deputadu António Verdial, hato’o deklarasaun polítika liga ba area edukasaun nian mak hanesan infraestrutura, fasilidade nomos Profesor sira iha territóriu nasional.
Antes tama ba informasaun diversas, Presidente Parlamentu, informa ba plenáriu katak, lista candidatura ba membru CNE nian prontu ona, no sei realiza plenária extraordinária iha loron quarta-feira, 14 fulan jullo tinan 2021, hodi halo eleisaun.
Hafoin ida-ne’e, Deputadu sira hato’o informasaun diversas mak hanesan, subsídiu ba idozu; pagamentu ba propinas ba alunu sira ba tempu ne’ebé la iha aula prezensial; farda no hahán ba guarda prizional sira; ministériu transporte no komunikasaun iha funsionariu kazual maibé sira la tama servisu no simu nafatin salariu; subsidiu ba estudante hodi selu propinas, Governo seidauk implemneta; nesesidade aselera estatutu no rejíme salarial Polísia Nasionál Timor-Leste (PNTL); Ro Tranship II ne’ebé la konsege atraka iha portu Díli; problema Eletrisidade, normalizasaun estrada no bee-moos ba komunidade sira, nomos problema importante sira seluk.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira, ho prezensa Ministru Asuntu Parlamentares no Komunikasaun, Francisco Jerónimo.
