Pagina Inicial»Noticia
Parlamentu Nasionál liu husi Komisaun A ne’ebe trata asuntu Justisa no Konstitusionais, halo ona diskusaun iha espesialidade ba Proposta Lei n.o 28/(3ª) – Organizasaun no Funsionamentu Tribunal sira, iha Munisipiu Aileu, iha loron 6 too 9 fulan jullu tinan 2021.
Diskusaun espesialidade ne’ebe prezide husi Prezidente Komisaun A, Deputadu Joaquim dos Santos «Boraluli», akompaña husi membru sira hetan prezensa husi orgaun judisiariu sira, hanesan Tribunal Rekursu, Defensoria Publika, Prokuradoria Jeral Repúblika, no entidade sira seluk.
Proposta Lei refere ho nia total artigu hamutuk 85, ne’ebe aprova ona artigo hamutuk 23 husi diskusaun loron tolu.
Lei refere importante tebes ba setor justisa, tanba husi lei estruturante ne’e bele define kompetensia no rekursu hirak ne’ebe bele presta servisu iha funsionamentu tribunal distrital, tribunal rekursu no tribunal supremu.
Husi proposta lei refere sei hamosu tan tribunal distrital balun inklui tribunal supremu no tribunal superior administrativa.
Durante diskusaun, Deputadu sira inklui orgaun judisiaria sira diskute klean kona-ba konteudu husi kada artigu, diskute mós rekursu humanu atu prenxe iha instituisaun sira ne’e.
Tuir agenda ne’ebe mak iha, Komisaun A hamutuk ho entidade judisiariu sira kontinua halo diskusaun iha espesialidade ba artigu hirak ne’ebe seidauk hetan aprovasaun iha semana tuir mai.
