Pagina Inicial»Noticia
Parlamentu Nasionál liu husi sesaun plenária iha loron 06 fulan jullu tinan 2021, Deputadu sira kontinua halo diskusaun no aprovasaun iha jeneralidade ba Proposta de Lei n.º 27/V(3ª) – Enkuadramentu Orsamentu Jeral Estadu no Jestaun Finanseira Estadu, ho 37 votu a favor, 12 kontra no 11 abstensaun.
Hafoin aprovasaun iha jeneralidade, plenária delibera diskusaun espesialidade ba Komisaun C ne’ebé trata asuntu Finansas Públikas ho 44 voto a favor, 0 kontra no 17 abstensaun.
Partisipa iha diskusaun ne’e Ministru Finansa ho nia Vise-Ministra ne’ebe hanesan proponente ba Proposta Lei refere.
Iha sesaun plenária ne’e, Bankada Parlamentar KHUNTO, reprezenta husi Deputadu António Verdial, hato’o deklarasaun politika kona-ba impaktu mundial husi Covid-19 nomos atividade edukativa liga ho prosesu aprendizajen no mudansa kalendáriu letivu iha Timor-Leste.
Hafoin ida-ne’e, Deputadu sira hato’o informasaun diversas mak hanesan, mekanismu rekrutamentu iha Timor Gap ba asesor internasionál; obrigatóriu vasina ba idozu sira; aluga Ro Tranship II ne’ebé ho kondisaun la diak; subsidiu ba estudante hodi selu propinas; afiliasaun partidária labele lori bandeira partidu ida nian hodi entrega ba partidu seluk; nesesidade aselera estatutu no rejíme salarial Polísia Nasionál Timor-Leste (PNTL); la iha manutensaun ba Estátua Presidente Francisco Xavier do Amaral iha rotunda Centro Convenções Díli (CCD); pasiente timoroan ida mate iha Paquistão husu Governu apoiu autorizasaun ba aviaun hodi transporta fila mate isin; nomos problema Eletrisidade normalizasaun estrada no bee-moos ba komunidade sira.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira, ho prezensa Sekretáriu Estadu Komunikasaun Sosial, Mericio Juvinal Akara; Ministru Finansas, Rui Gomes ho nia komitiva.
