Pagina Inicial»Noticia
Parlamentu Nasionál liu husi sesaun plenária iha loron 05 fulan jullu tinan 2021, Deputadu sira halo diskusaun iha jeneralidade ba Proposta de Lei n.º 27/V(3ª) – Enkuadramentu do Orsamentu Jeral Estadu no Jestaun Finanseira Estadu.
Partisipa iha diskusaun ne’e Ministru Finansa ho nia Vise-Ministra ne’ebe hanesan proponente ba Proposta Lei refere.
Sesaun plenaria ne’e hahú ho exekuta Hino Nasionál Timor-Leste, hafoin ida-ne’e, Deputadu sira hato’o informasaun diversas mak hanesan, ema sunu rai iha parte Subaun nian; falta ai-moruk iha hospital sira; Eskola sira maioria la iha kondisaun; trata dokumentu kareta pesoal diplomatiku Japão nian iha Timor selu taxa, maibé, Timor-Leste nian iha Japão la selu; la iha jestaun di’ak husi Governante sira ba vendedor sira iha bazar Tasi-tolu; Covid variante delta ida tama ona iha Timor tuir informasaun iha Timor Post; jestaun lixu; pasiente timoroan sira iha nasaun estrajeiru seidauk simu subsidiu durante fulan haat ona; estudante timoroan sira ne’ebe atu ba Indonésia hodi kontinua estudu maibé sira nia KITAS mate; husu explikasaun relasiona ho kazu matebian Hilaria ne’ebé mak hakotu vida moris hafoin simu vasina iha Bobonaro; populasaun ne’ebé simu ona vasina AstraZeneca primeira doze, atu simu tan segunda Doze maibé vasina hotu; nomos problema básica hanesan Problema eletricidade, normalizasaun estrada no bee-moos ba komunidade sira.
Sekretáriu Estadu Komunikasaun Sosial, Mericio Juvinal Akara, hatete, informasaun kona-ba subsidiu ba pasiente timoroan ne’ebe iha estranjeiru, Ministériu Saúde transfere ona; relasiona ho publikasaun iha Jornal Timor Post, ne’e informasaun laloos, tanba atu identifika vírus delta ne’e iha ou lae ne’e tenki liu husi teste laboratorio; informasaun sira seluk sei transmite ba ministério relevante sira hodi halo intervensaun teknika.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira, ho prezensa Sekretáriu Estadu Komunikasaun Sosial, Mericio Juvinal Akara; Ministru Finansas, Rui Gomes ho nia komitiva.
