Pagina Inicial»Noticia
Komisaun E ne’ebe trata asuntu Infraestrutura iha Parlamentu Nasionál, iha loron 1 too 2 fulan jullu tinan 2021, halo fiskalizasaun iha Munisipiu Manatuto.
Atividade fiskalizasaun ne’ebe lidera husi Prezidente Komisaun E, Deputadu Abel Pires da Silva, akompaña husi membru sira no Obras Públikas inklui ADN Munisipiu Manatuto ne’e hahú fiskaliza estrada ligasaun Manatuto vila ba Laclubar, valeta liuliu ponte entrada Postu Administrativu Laclubar ne’ebe aat kauza husi inundasaun ne’ebe akontese iha loron 4 fulan abril liu ba.
Hafoin observa ponte ne’ebe aat, kontinua kedas ba observa estrada ne’ebe halo ligasaun Kribas ba Sanan Nain ne’ebe mota estraga iha fulan abril liu ba.
Iha loron tuir mai, Komisaun E halo observasaun ba estrada sira iha kapital Munisipiu Manatuto no ponte Laleia inklui moru protesaun ne’ebe hetan estragu iha fulan hirak liu ba.
Vise-Prezidente Komisaun E, Deputadu Fabião Oliveira, hatete husi atividade fiskalizasaun ne’ebe Komisaun E hala’o deteta estrada no ponte inklui moru protesaun sira ne’ebe presija tebes atensaun urjente husi Governu liuliu Obras Públikas hodi halo manutensaun no normalizasaun.
Vise-Prezidente Komisaun E mós husu ba Obras Públikas atu orienta Instituto Jestaun Ekipamentu (IGE) hodi halo normalizasaun ho urjente atu la bele fó impaktu makas ba komunidade sira.
