Pagina Inicial»Noticia
Parlamentu Nasionál liu husi Sesaun Plenária extraordinária, iha loron 30 fulan juñu tinan 2021, autoriza Prezidente Repúblika, Francisco Guterres “Lu-Olo”, hodi dekreta Estadu Emerjénsia ba dala 15º iha teritóriu nasionál ho durasaun loron 30, hahú iha loron 2 fulan jullu 00h00 too loron 31 fulan jullo tinan 2021, 23h59.
Sesaun plenária ne’e rasik hetan abertura husi Prezidente Parlamentu Nasionál, hafoin kontinua ho leitura ba giaun nomos mensajen Prezidente Repúblika nian husi Sekretária Meza, Deputada Lídia Norberta dos Santos.
Husi mensajen ne’e, Presidente Repúblika deskreve kona-ba impaktu husi pandemia Covid-19 iha mundu ne’ebé hamate ema rihun ba rihun, nune’e mós iha Timor-Leste, rejista kazu 801 (atus ualu ida) kazu ativu konfirmadu, husi total 9.055 (rihun sia lima-nulu-resin-lima) kazus no rejistu kazu mate hamutuk ema na’in 21 (rua-nulu-resin-ida) iha teritoriu nasionál.
Além de ne’e kazu foun variante Delta sirkula iha nasaun indonésia, ida ne’e sai ameasa ba nasaun Timor-Leste ne’ebé nia fronteira terrestre direita ho Indonézia.
Tanba ne’e importante tebes Estadu Timor-Leste kontinua implementa Estadu Emerjénsia nune’e Governu bele kontrola no prevene di’ak liu tan kontajiu moras refere ba komunidade. Entretantu medida sira mantem hanesan ho Estadu Emerjénsia anterior, no kontínua konsentra ba prevensaun no kombate covid-19.
Iha intervensaun Deputadu sira nian, kestiona impaktu husi implementasaun Estadu Emergência ninia ba moris populasaun no pessoal linha frente sira, no husu sidadaun hotu atu koopera ho Governu hodi kombate transmisaun covid-19, no kontinua atu simu nafatin vacina hodi aumenta imunidade no proteje’an ba kombate covid-19, husu Governu atu implementa planu sira ho diak no kontinua halo kampaña sosializasaun ba vantajen husi vacina AtraZeneca no Sinovac no precisa halo prevensaun ne’ebé máximu iha munisípiu sira.
Autorizasaun ba deklarasaun Estadu Emerjénsia ne’e ho forma lei, ho nune’e, liu husi diskusaun naruk, Deputadu sira liu husi votasaun nominal aprova Proposta Lei n.º 36/2021 - Autorizasaun ba renovasaun Deklarasaun Estadu Emerjénsia, ho 39 votu a favor, 0 kontra no 20 abstensaun. Nune’e autoriza Xefe Estadu hodi dekreta Estadu Emerjénsia ba dala 15º.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira no hetan prezensa husi Ministru Presidência ba Konsellu Ministru sira, Fidelis Leite Magalhães representa Primeiru Ministru, hamutuk ho Membru Governu sira seluk, nomos ekipa Sala Situasaun nian.
