Pagina Inicial»Noticia
Parlamentu Nasionál liu husi sesaun plenária iha loron 28 fulan juñu tinan 2021, Deputadu sira halo aprovasaun final no global ba Proposta de Lei n.º 30V(3ª) – Terceira Alteração à Lei n.º 5/2006, de 28 de dezembro, sobre Órgãos da Administração Eleitoral, da Proposta de Lei n.º 31/V(3ª) – Primeira Alteração à Lei n.º 6/2016, de 25 de maio, Lei do Recenseamento Eleitoral e da Proposta de Lei n.º 33/V(3ª) – Sexta Alteração à Lei n.º 7/2006, de 28 de dezembro, Lei Eleitoral para o Presidente da República.
Proposta Lei tolu ne’e, plenáriu halo votação ketak-ketak, maibé, ho resultado unanime 62 votu a favor, 0 kontra no 0 abstensaun.
Bankada Parlamentar KHUNTO, representa husi Deputadu António Verdial, hato’o deklarasaun politika liga ba área edukasaun prinsipalmente prosesu aprendizajem iha Timor laran tomak.
Além de ne’e, Deputadu sira foti kestaun ou problema sira mak hanesan, veteranu balun to’o agora seidauk hetan sira nia direitu hanesan subsidiu veteranu sira nian; problema estrada, eletrisidade no bee-moos iha munisipiu sira hotu; impaktu husi vasina AstraZeneca ba populasaun nia saúde; Ro Custom Indonésia nian ida embarka iha Ataúro ho armas; Pesoal Saude sira servisu liña frente seidauk hetan subsidiu durante fulan lima ona; sistema aprovizionamentu, prosesu sira husi ADN konklui ona maibé tenki ba fali UPMA hodi verifika; iha Munisipiu Baucau populasaun antusiasmu atu simu vasina maibé aimoruk mak la to; problema liga ho Ro Tranship II;
Ministru ba Asuntu Parlamentares no Komunikasaun, Francisco Jerónimo, hatete, relaciona ho problema vasina AstraZeneca, vasina ne’e nia alvu primeiru mak ba ema ho idade 60 ba leten, maibé mós la taka dalan atu populasaun sira bele simu, nune mós ho vasina Sinovac, ninia alvu mak estudante, dosente nomos profesor sira, maibé mós la taka dalan atu populasaun sira bele simu; problema remuneratóriu ba pesoal liña frente hanesan pesoal saúde, Governu submete ona dekretu lei renumeratoriu ba Prezidente Repúblika hodi halo promulgasaun, wainhira promulga ona, Governu sei halo pagamentu hahú husi fulan abril tinan 2021; informasaun seluk sei hato’o ba Ministériu Kompetente hodi fó resposta.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira, ho prezensa Ministru ba Assuntu Parlamentar no Komunikasaun, Francisco Jerónimo, Ministru Administrasaun Estatal, Miguel Pereira de Carvalho ho komitiva.
