Pagina Inicial»Noticia
Parlamentu Nasionál Timor-Leste reprezenta husi Sekretáriu-Jerál, Adelino Afonso de Jesus, asina akordu ho Rádiu no Televizaun Timor-Leste, (RTTL,E.P), ne’ebe reprezenta husi Prezidente Konsellu, José António Belo, iha loron 16 fulan juñu 2021, iha Sala Konferénsia Parlamentu Nasionál.
Iha diskursu Sekretáriu-Jerál, Adelino Afonso de Jesus, haktuir katak liu-husi akordu ida-ne’e bele fó oportunidade ba Parlamentu Nasionál hodi divulga programa informativu no edukativu semanal. Programa ida-ne’e aliña-an iha Planu Estratéjiku Parlamentu Nasionál 2017-2022, hodi promove kultura abertura no transparánsia, liu-husi divulgasaun informasaun, informativu no edukativu kona-ba servisu parlamentar ba nia sidadaun sira iha teritóriu nasionál no iha estranjeiru.
Iha fatin hanesan Prezidente Konsellu Administrasaun RTTL, E.P., José António Belo, agradese ba Parlamentu Nasionál ninia konfiansa hodi servisu hamutuk ho RTTL.E.P., ne’ebe hanesan empreza estatál ida, ne’ebe nu’udar instrumentu ida atu reforsa polítika Parlamentu Nasionál nian, hodi divulga informasaun relevante sira kona-ba papel no funsionamentu Parlamentu Nasionál ne’e.
Akordu ne’e regula forma no kondisões ba partes konvenientes ba dezenvolvimentu programa kooperasaun no interkámbiu técnico no profissionál, ho objetivu prinsipál atu dezenvolve Rádio no Televisão Parlamentu Nasionál, nomeadamente apoio ba diseminasaun informasões parlamentares ba populasaun sira hotu. Àreas kooperasaun sira kobre ba produsaun materiais ba televizaun semanál ho durasaun minutos 60, aluga Satélite no Estasaun Relay iha RTTL, E.P. hodi alargamentu frequência Rádio Parlamento Nacional, no instalasaun ekipamentus komunikasaun iha Munisípius, Ainaro, Baucau, Liquiçá, Viqueque no Rejiaun Administrativa Oecússi Ambeno (RAEOA).
