Pagina Inicial»Noticia
Komisaun B ne’ebe trata asuntu Negósiu Estranjeiru, Defeza no Seguransa, no Komisaun G ne’ebe trata asuntu Edukasaun, Juventude, Kultura no Sidadania, halo audiénsia ho Governu liu-husi ministériu relevante balun, iha loron 15 fulan juñu tinan 2021, iha Parlamentu Nasionál.
Komisaun B halo audiénsia ho Vise-Ministru Interior, António Armindo, ne’ebé akompaña husi Komadante-Jerál Polísia Nasionál Timor-Leste (PNTL), Komisáriu Faustino da Costa, ho nia ekipa hodi diskute kona-ba utilizasaun armas husi membru PNTL. Iha audiénsia ne’e, Komisaun B rekomenda ba Vise-Ministru Interior ho Komadante-Jerál atu sempre hodi alerta ba membru-sira kona-ba mekanizmu uza arma sira.
Rekomendasaun ne’e bazeia ba norma sira ne’ebe haktuir iha despaixu n.º 290/CG-PNTL/IX/2016 alinea b, ne’ebé prevê proibisaun ba ajente polisiál lori armas ba uma, hanesan mós iha alinea f kona-ba utilizasaun armas iha deslokasaun ba servisu, desde iha orientasaun husi komadante sira relativa ba servisu polísia nian.
Entretantu, Komisaun G halo audiénsia ho Ministru Edukasaun, Juventude no Desportu, Armindo Maia, ho nia komitiva kona-ba Prosesu aprendisájen distinsiamentu ka on-line, infrastrutura eskola nian, problema ajente Administrasaun Públika 93 ne’ebé to’o agora seidauk rezolve, programa prioridade sira ba tinan 2021 no professor permanente sira ne’ebe mak idade reforma ona.
Atividades audiénsia ne’e dirije direitamente husi Prezidente kada Komisaun, Deputadu José Agustino Sequira ‘’Somocho’’ no Deputadu António Verdial Sousa, akompaña husi membru sira komisaun.
