Pagina Inicial»Noticia
Prezidente Parlamentu Nasionál, Aniceto Longuinhos Guterres Lopes, partisipa iha serimónia lansamentu Vasina Cinovac, iha loron 14 fulan juñu tinan 2021, iha salaun Universidade Nasionál Timor Lorosa’e (UNTL).
Serimónia refere hetan prezensa husi Ministra Saúde, Ministru Edukasaun no Desportu, Ministru Ensinu Superior, Ministru Defeza no Embaixadór Repúblika Popular China, diplomatiku sira, Reitor UNTL, Dosente sira inklui estudante sira.
Prezidente Parlamentu Nasionál iha dirkursu hatete mundu tomak agora preokupa no luta kontra Covid-19, enkuantu iha nasaun balun hahú mosu tan moras ka vírus foun.
Tanba ne’e Estadu no povu tomak tenke esforsu liuliu hahú husi komportamentu idaidak nian ba prevensaun Covid-19 iha Timor-Leste. Nasaun barak inklui Timor-Leste vansa ona ba medida prevensaun liu husi vasina, nune’e husu ba publiku atu partisipa iha vasina ne’ebe Governu liu husi Ministériu Saúde hala’o ona.
Estadu agradese ba Organizasaun Mundial Saúde ne’ebe bele fasilita ona vasina AstraZeneca no Cinovac hodi combate vírus refere. Hanesan Prezidente Parlamentu Nasionál agradese tebes ba Governu China inklui Ómologo Pezidente Asembleia Popular China no Governu Australia ne’ebe oferese ona vasina hirak ne’e ba Estadu Timor-Leste.
