Pagina Inicial»Noticia
Parlamentu Nasionál, iha loron 14 fulan juñu tinan 2021, liu husi sesaun plenária, halo debate ho Governu kona-ba Estratejia Kombate Pandemia Covid-19 iha Timor-Leste.
Debate ho Governu ne’e prezide husi Vise-Prezidente Parlamentu Nasionál, Angelina A. Lopes Sarmento, akompaña husi membru Meza sira, no hetan prezensa husi Ministru Prezidensia Konsellu Ministru, Fidélis Manuel Leite Magalhães, Ministra Saúde, Odete Maria Freitas Belo, ho nia ekipa sira.
Durante diskusaun Deputadu sira ko’alia liu kona-ba medida prevensaun sira liuliu progresu vasina durante ne’e ba sidadaun sira.
Tanba durante ne’e, iha difikuldade barak ne’ebe Governu presija rezolve, atu Covid-19 ne’e labele daet ba ema seluk. Nune’e kontrolu publiku no fatin izolamentu sira presiza iha kontrolu ne’ebe maximu husi autoridade kompetente sira.
Governu rekoñese iha difikuldade barak liuliu iha medida prevensaun nian, maibé ho kondisaun ne’ebe mak iha kontinua esforsu hodi prevene no kombate Covid-19.
Ministra Saúde hatete, ekipa saúde nian kontinua halo observasaun no akompañamentu ba izolamentu sira no sosializasaun ba publiku atu bele halo prevensaun no kombate vírus refere.
Iha prosesu vasina iha Timor-Leste kontinua iha progresu husi loron ba loron, tanba komunidade barak iha konsensia rasik hodi tuir vasina iha sentru saúde ne’ebe destakadu.
Entretantu iha parte dadeer nian, Deputadu sira halo votu kongratulasaun ba tinan 100 padre João Vasconcelos Baptista Felgueiras, ho 46 votu a favor, 0 kontra no 0 abstensaun.
