Pagina Inicial»Noticia
Parlamentu Nasionál liu husi sesaun plenária ordinária iha loron 31 fulan maiu tinan 2021, aprova ona iha final global ba Proposta Lei n.o 29/V(3ª) – ne’ebe altera Lei n.o 11/2009, 7 outubru kona-ba Divizaun Administrativa Territóriu, ho 54 votu a favor, 0 kontra no 0 abstensaun.
Iha sesaun plenária ne’e mós aprova Projetu Rezolusaun Parlamentu Nasionál n.o74/V(3ª) – kona-ba situasaun iha Myanmar, ho 51 votu a favor, 0 kontra no1 abstensaun. No Meza Parlamentu Nasionál baixa ba Komisaun Asuntu Konstitusional no Justisa (Komisaun A) Proposta Lei n.o 30/V(3ª) – alterasaun datoluk ba Lei n.o 5/2006, 28 dezembru kona-ba Orgaun Administrasaun Eleitoral, Proposta Lei n.o31/V(3ª) – alterasaun dahuluk ba Lei n.o 6/2016, 25 maiu, Lei Resensiamentu Eleitoral no Proposta Lei n.o 33/V(3ª) – alterasaun daneen ba Lei n.o 7/2006, 28 dezembru, Lei Eleitoral ba Prezidente Repúblika.
Antretantu iha período antes ordem do dia nian, Bankada Parlamentar KHUNTO liu husi Deputadu António Verdial de Sousa, aprezenta deklarasaun politika ne’ebe ko’alia kona-ba Prosesu aprendizajen iha Estadu Emerjénsia no subsidiu ba estudante sira.
Iha intervensaun diversa nian, Deputadu sira kontinua ejije ba Governu atu implementa ona subsidiu ba estudante sira, buka tuir ruin husi saudozo sira líder nasionál liuliu Prezidente Nicolau Lobato, ne’ebe too agora seidauk hetan, kombate ID falsu sira iha rede sosial, kondisaun estrada sira no asuntu sira seluk.
Sekretáriu Estadu ba Komunikasaun Sosial, Merício Juvinal dos Reis «Akara», hatete preokupasaun barak Governu hahu atende ona no sira seluk Governu liu husi ministériu relevante sira kontinua esforsu hodi buka solusaun tuir nesesidade no kondisaun ne’ebe mak iha.
Sesaun Plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira no hetan prezensa husi Sekretáriu Estadu ba Komunikasaun Sosial, Merício Juvinal dos Reis «Akara».
