Pagina Inicial»Noticia
Parlamentu Nasionál liu husi Sesaun Plenária extraordinária, iha loron 28 fulan maiu tinan 2021, autoriza Prezidente Repúblika, Francisco Guterres “Lu-Olo”, hodi dekreta Estadu Emerjénsia ba dala 14º iha teritóriu nasionál ho durasaun loron 30, hahú iha loron 2 fulan juñu 00h00 too loron 1 fulan jullu tinan 2021, 23h59.
Sesaun plenária ne’e rasik hetan abertura husi Prezidente Parlamentu Nasionál, hafoin kontinua ho leitura ba giaun nomos mensajen Prezidente Repúblika nian husi Sekretária Meza, Deputada Lídia Norberta dos Santos.
Husi mensajen ne’e, deskreve kona-ba impaktu husi pandemia Covid-19 iha mundu ne’ebé hamate ema rihun ba rihun, nune’e mós iha Timor-Leste, dezde fulan marsu 2020 ejisti kazu akumulativu hamutuk 6.014, husi numeru ida-ne’e, kazu ativu hamutuk 2.666 no kazu mate hamutuk ema na’in 14. Iha fulan ikus nian, risku trasmisaun Covid iha Timor-Leste grave loron-loron numeru pojitivu aumenta maka’as, tuir deklarasaun husi Sentru Integradu Jestaun Krize, Kapitál Díli iha ona trasmisaun komunitária husi vírus refere, tuir kriteriu klasifikasaun ne’ebe defini husi Organizasaun Mundial Sáude nian.
Tanba ne’e importante tebes Estadu Timor-Leste kontinua implementa Estadu Emerjénsia nune’e Governu bele kontrola no prevene di’ak liu tan kontajiu moras refere ba komunidade. Entretantu medida sira mantem hanesan ho Estadu Emerjénsia anterior, no kontínua konsentra ba prevensaun no kombate covid-19.
Iha intervensaun Deputadu sira nian, kestiona problema sira hanesan fatin izolamentu sira ho medida sira oinsá komunidade sira bele kumpri regra sira ne’e no husu Governu atu kontínua halo kampaña sosializasaun no halo prevensaun ne’ebé máximu iha Díli nomos munisípiu sira.
Autorizasaun ba deklarasaun Estadu Emerjénsia ne’e ho forma lei, ho nune’e, liu husi diskusaun naruk, Deputadu sira liu husi votasaun nominal aprova Lei n.o 36/2021 - Autorizasaun ba renovasaun Deklarasaun Estadu Emerjénsia, ho 35 Votu a favor, 0 kontra no 21 abstensaun. Nune’e autoriza Xefe Estadu hodi dekreta Estadu Emerjénsia ba dala 14º.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira no hetan prezensa husi Primeiru-Ministru, Taur Matan Ruak, hamutuk ho membru Governu sira seluk, nomos ekipa Sala Situasaun.
