Pagina Inicial»Noticia
Parlamentu Nasionál, liu husi sesaun solene iha loron 27 fulan maiu tinan 2021, fó omenajem ikus ba saudoza membru Asembleia Konstituinte no Deputada I Lejislatura, Lourdes Maria Assunção de Jesus Mascarenhas Alves «BIKIAK», ne’ebe hakotu iis iha nia rezidénsia Kuluhun Díli, iha loron 24 fulan maiu tinan 2021. No saudozo Deputadu II Lejislatura no Vise-Prezidente Parlamentu Nasionál iha III Lejislatura, Eduardo de Deus Barreto «DUSAE», ne’ebe hakotu iis iha ospitál Karawaci Jakarta, iha loron 26 fulan maiu tinan 2021.
Omenajem ikus ne’e hato’o liu husi votu pezar ba saudoza Lourdes Maria Assunção de Jesus Mascarenhas Alves «BIKIAK» ho 54 a favor 0 kontra no 0 abstensaun, no saudozo Eduardo de Deus Barreto «DUSAE» ho 54 a favor 0 kontra no 0 abstensaun.
Iha sesaun omenajen ne’e, hahú ho Hinu Nasionál no minutu ida hakmatek ne’ebé deriji husi Prezidente Parlamentu Nasionál, no kontinua fó tempu ba Bankada Parlamentar sira hodi hato’o sentidu kondolensia ba família sira, no expresa sentimentu triste hodi hanoin kontribuisaun saudoza no saudozo durante tempu rezistensia no iha prosesu dezenvolvimentu nasionál.
Prezidente Parlamentu Nasionál, Aniceto Longuinhos Guterres Lopes, lori Parlamentu Nasionál nia naran, hato’o sentidu kondolensia kle’an no solidariedade ba família saudoza no saudozo nian.
Sesaun omenajem ne’e termina ho leitura ba votu pezar ne’ebe Parlamentu Nasionál aprova ona antes família saudoza BIKIAK kontinua ba serimónia fúnebre iha Semiteriu Heroi Patria nian iha Metinaro Díli, no família saudozo DUSAE kontinua lori ba rezidensia iha Munisipiu Ermera antes hala’o fúnebre.
