Pagina Inicial»Noticia
Parlamentu Nasionál, liu husi sesaun plenária ordinária, iha loron 24 fulan maiu tinan 2021, Deputadu sira halo aprovasaun final no global ho unanimidade ba Projeto de Lei nº 4/V(1ª) – Código Mineiro, ho 56 votu a favor, 0 kontra no 0 abstensaun, nomos Proposta de Lei nº 21/V (2ª) – Primeira alteração à Lei da Defesa Nacional, ho 39 votu a favor, 0 kontra no 13 abstensaun.
Iha sesaun plenária ne’e mós, Komisaun D ne’ebé trata asuntu Ekonomia no Dezenvolvimentu, halo aprezentasaun relatóriu vizita servisu nian ba Ministériu Petroliu no Minerais, Institutu Petróliu no Jeolójia no Ministériu Agrikultura no Peskas.
Hafoin ida-ne’e, Bankada Parlamentar KHUNTO, reprezenta husi Deputadu Antonio Verdial hato’o deklarasaun polítika relasiona ho situsaun distribuisaun cesta basika, edukasaun, ekonomia no jurídika iha Timor-Leste.
Iha intervensaun diversas, Deputadu sira, kontinua kestiona problema sira mak hanesan, eletrisidade, bee-moos, estrada, kontratu Governu nian ba ró foun ne’ebe atu substitui ró Nakroma; fornese makina koa haree ba komunidade sira iha Maliana, servisu saúde munisípiu lao la normal halo ema moras tauk ba hospital, atuasaun membru polísia balun ne’ebé halo agresaun fisiku ba populasaun sira iha baze; husu Governu avalia medida implementasaun sira ba situasaun covid-19 nian, nomos informasaun importante sira seluk.
Hatán ba preokupasaun sira ne’e, Ministru ba Assuntu Parlamentar no Komunikasaun, Francisco Jerónimo hatete, kazu agresaun físiku husi membru Polisia Nasional Timor-Leste, kazu ne’e tama ona iha investigasaun no hein rezultadu; relasiona implementasaun regra Estadu Emerjénsia sira kontrariu ho dekretu Prezidensial Repúblika nian Ministru ne’e hatete presiza hato’o keisa ba Tribunal hodi deside; kestaun kona-ba populasaun hamlaha, Ministériu Solidariedade Sosial no Inkluzaun fahe ona foos ba komunidade sira; kestaun seluk, Governu regista no sei hato’o ba Ministériu relevante sira hodi fó resposta, nomós Governu nafatin halo avaliasaun iha implementasaun sira.
Além de ne’e, Meza Anunsiu admisaun no baixa Projeto de Lei nº 17/V(3ª) – que altera Código de Processo Penal no Projeto de Lei nº 18/V(3ª) – Primeira Alteração à Lei da Defesa Nacional ba komisaun kompetente Parlamentu Nasionál.
Sesaun plenária ne’e prezidi husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira, no hetan prezensa husi Ministru ba Asuntu Parlamentar no Komunisaun, Francisco Jerónimo, Ministru Petróliu no Minerais, Victor da Conceição Soares no Ministru Defeza, Filomeno da Paixão de Jesus.
