Pagina Inicial»Noticia
Komisaun A ne’ebé trata asuntu Konstitusional no Justisa, iha loron 29 fulan abril tinan 2021, halo audiénsia ho Komandante Jerál Polisia Nasional Timor-Leste (PNTL), Komisáriu Faustinho da Costa, ho nia ekipa kona-ba prosesu indeminizasaun ba populasaun afetadu sira iha Suku Kaikoli liga ba konstrusaun edifisiu foun PNTL.
Durante audiénsia, Komisaun A rona aprezentasaun barak husi parte PNTL no Ministériu Interior kona-ba kazu populasaun afetadu sira ho nia solusaun no alternativa hirak ne’ebe parte PNTL ho Ministériu Justisa foti nune’e Komisaun A mós bele fó opiniaun no pareser ba situasaun refere.
Hafoin audiénsia, komisaun kontinua ho aprezentasaun husi Asesor Komisaun nian ba Projetu Lei nº 25/V/(3ª) – Programa Formasaun ba Setór da Justisa no Proposta Lei nº 21/V/(3ª) – Estatuto Majistradu Judisiariu.
Audiéncia ne’e rasik prezide husi Prezidente Komisaun, Deputadu Joaquim dos Santos Boraluli, akompaña husi Deputadu sira komisaun nian.
Além de ne’e, Komisaun B ne’ebé trata asuntu Negosiu Estranjeiru, Defesa no Seguransa Nasionál halo audiénsia ho Vise-Ministru Interior, António Armindo ho Vise-Ministru Negosiu Estranjeiru no Kooperasaun, Juliao da Silva, ho nia ekipa hodi diskuti no aprova iha espesialidade ba Projeto de Lei nº 25/V/(3ª) procede a primeira alteração à Lei nº 11/2017, de 24 de maio, Lei de Migração e Asilo.
Entretanto komisaun sira seluk mós hala’o sira nia reuniaun hodi apresia no aprova planu asaun anual ba tinan 2022 nian, nomos planu atividade segundu semestre tinan 2021 nian. Komisaun C, halo mós apresiasaun no aprovasaun ba proposta kalendáriu ba apresiasaun inisial ba Lei Enkuadramentu Osamental.
