Pagina Inicial»Noticia
Parlamentu Nasionál liu husi Sesaun Plenária extraordinária, iha loron 28 fulan abril tinan 2021, autoriza Prezidente Repúblika, Francisco Guterres “Lu-Olo”, hodi dekreta Estadu Emerjénsia ba dala 13º iha teritóriu nasionál ho durasaun loron 30, hahú iha loron 3 fulan maiu 00h00 horas too loron 1 fulan juñu tinan 2021, 23h59.
Sesaun plenária ne’e rasik hetan abertura husi Prezidente Parlamentu Nasionál, hafoin kontinua ho leitura ba giaun nomos mensajen Prezidente Repúblika nian husi Sekretária Meza, Deputada Lídia Norberta dos Santos.
Husi mensajen ne’e, deskreve kona-ba impaktu husi pandemia Covid-19 iha mundu ne’ebé hamate ema rihun ba rihun, nune’e mós iha Timor-Leste, dezde fulan marsu 2020 ijisti kazu akumulativu hamutuk 1.949, husi numeru ida-ne’e, kazu ativu hamutuk 1.050 no kazu mate hamutuk ema na’in 3 (tolu). Iha fulan ikus nian, risku trasmisaun Covid iha Timor-Leste grave loron-loron numeru pojitivu aumenta maka’as, tuir deklarasaun husi Sentru Integradu Jestaun Krize, Kapitál Díli iha ona trasmisaun komunitária husi vírus refere, tuir kriteriu klasifikasaun ne’ebe defini husi Organizasaun Mundial Sáude nian.
Tuir dadus nível mundial foin lalais iha loron 27 fulan abril tinan 2021, husi Organizasaun Mundial Saúde, iha tokon 147 kazu SARS-CoV-2 no liu tokon 3 ne’ebe mate relasiona ho Covid-19.
Tanba ne’e importante tebes Estadu Timor-Leste kontinua implementa Estadu Emerjénsia nune’e Governu bele kontrola no prevene di’ak liu tan kontajiu moras refere ba komunidade. Entretantu medida sira mantem hanesan ho Estadu Emerjénsia anterior, no kontínua konsentra ba prevensaun no kombate covid-19.
Iha intervensaun Deputadu sira nian, kestiona problema sira hanesan fatin izolamentu iha munisípio Manufahi iha komunidade nia le’et; Diretora Sentru Saúde Manufahi, fó livre ba líder komunitaria ne’ebé tama iha kuarentena; nesesidade atu halo test swab iha Díli nomos munisípio sira tanba iha ona transmisaun komunitaria; nomos informasaun importante sira seluk liga ho implementasaun Estadu Emerjénsia nian; no ikus liu, husu Governu atu kontínua halo kampaña sosializasaun no halo prevensaun ne’ebé máximu iha Díli nomos munisípiu sira.
Autorizasaun ba deklarasaun Estadu Emerjénsia ne’e ho forma lei, ho nune’e, liu husi diskusaun naruk, Deputadu sira liu husi votasaun nominal aprova Proposta Lei nº 27/V/3ª- Autorizasaun ba renovasaun Deklarasaun Estadu Emerjénsia, ho 43 Votu a favor, 0 kontra no 16 abstensaun. Nune’e autoriza Xefe Estadu hodi dekreta Estadu Emerjénsia ba dala 13º.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira no hetan prezensa husi Vise-Primeiru-Ministru, José Maria dos Reis, hamutuk ho membru Governu sira seluk, nomos, ekipa Sala Situasaun.
