Pagina Inicial»Noticia
Parlamentu Nasionál liu husi sesaun plenária iha loron 23 fulan abril tinan 2021, aprova ona final global ba Proposta Lei n.o 32/V(3ª) – alterasaun dahuluk ba Lei n.o 14/2020, 29 dezembru kona-ba Orsamentu Jeral Estadu 2021 nian, ho 44 voto a favor,0 kontra no 20 abstensaun.
Durante diskusaun, Deputadu sira aprova mós proposta sira liga ba artigu hirak ne’ebe iha proposta lei ne’e inklui ministériu hirak ne’ebe hetan alterasaun ba nia orsamentu.
Deputadu sira husu ba Governu atu konsentra mós planu no programa hirak ne’ebe konsidera importante tebes atu la bele prezudika dezenvolvimentu ne’ebe lao daudauk. Deputadu sira promete atu kontinua fiskaliza orsamentu ne’ebe aprovadu ho nia programa sira.
Primeiru-Ministru, Taur Matan Ruak, lori Governu nia naran kontinua husu apoiu Parlamentu Nasionál iha implementasaun programa sira ne’e atu rezolve problema ne’ebe nasaun enfrenta.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira no hetan prezensa husi Primeiru-Ministru, Taur Matan Ruak, ho nia membru Governu sira.
