Pagina Inicial»Noticia
Povu doben Timor-Leste tomak, Estadu Preukupa ho propagasaun Covid 19 no nia impaktu ba saúde públika, ba sira nia moris, ba vida sosiál, ekonomika no funsionamentu Orgaun Estadu tomak. Tinan ida ona ita hasoru Virus ne´e ho Estadu emerjénsia, ho serka sanitariu no ho konfinamentu maibé kontinua namkari to ona ita nia Suku, Bairu no ita nia uma laran. Situasaun ne’ebé virus kria hamate ita nia atividade bain-bain, ita nia aktividade ekonómika, ita nia kontaktu ho família, ita nia movimentu no ita nia atividade Relijioza.
Preokupa ho situasaun hirak ne´e Governu halo esforsu tomak hodi buka vasina ne´ebé relevante ho situasaun Timor-Leste, hodi hamate virus ne´e labele daet tan no hamate sidadaun sira. Vasina ne´e naran Astrazaneca ne’ebé to’o ona iha ita nia Rai. Molok, vasina ne’e to’o, ita rona, imi mos rona informasaun oin-oin katak vasina ne´e estraga tan ema, halo virus siak liu tan no seluk-seluk tan. Nu’udar Prezidente Parlamentu, no lori orgaun Soberania ne’ebé reprezenta Povu nia fatin,
ho laran tomak, husu ba sidadaun htu-hotu atu halakon hanoin negativu kona ba aimoruk ne’e, lalika fiar iha informasaun falsu sira ne’ebé hanaruk impaktu negativu husi virus ne´e ba ita nia moris, fó konfiansa ba Estadu, ba Governu no ita nia pesoál saúde sira nia esforsu no ho laran kman hakbesik-an hodi simu vasina ne’e.
Estadu, Governu Ukun-nain sira halo esforsu hotu-hotu hodi salva sidadaun hotu-hotu husi virus ida ne´e. La iha Estadu ida, Governu ida mak halo esforsu, gasta osan hodi buka aimoruk ida ba estraga nia povu rasik. Vasina AstraZeneca ne’ebé ita hili, hetan analize, teste husi matenek sira kona ba virus, husi Organizasaun Saúde Mundiál no sukat ho ita nia kondisaun fasilidades saúde nian, sukat ho ita nia klima, sukat ho aimoruk nia manutensaun tuir ita nia klima.
Hau rasik, Sua Exelénsia Primeiru Ministru, Dom Virgilio Arcebispo Arquidiocese Dili, Vices Prezidente Parlamento Nasionál, Vices-Primeiru Ministru, Ex-Titular Dr. Ramos Horta simu ona vasina ne’e. Liu tiha vasina ne’e, iha duni reasaun iha ita nia isin hanesan liman todan, isin manas ka malirin no seluk tan, maibé nu’udar efeitu
husi aimoruk nia sirkulasaun iha ita nia isin. Efeitu hirak ne’e sei lakon no ita nia kapasidade imunidade aumenta hodi hamate virus ne’e. Ho referénsia hirak ne’e
dala ida tan, ho laran tomak, hau husu ba sidadaun hotu-hotu atu hakman-an ba simu vasina ne’e wainhira to’o ita-boot sira nia tempu no to’o iha ita-boot sira nia postu, suku ka aldeia.
Molok termina, dala ida tan korajen, fiar katak vasina ne’e diak mai ita. Fiar ba ita nia médiku no pesoál saúde Nasionál no Internasionál sira, ne’ebé hala’o sira nia kna’ar iha laboratórium no rezultadu servisu bazeia de’it ba estúdu siéntifiku. Tamba ne’e, estadu iha autoridade tomak atu assegura situasaun hotu relasiona ho Covid-19 iha Timor-Leste.
Salva ita-an, salva ema seluk no salva ita nia Nasaun.
Obrigadu no hakoak boot ba imi hotu.
