Pagina Inicial»Noticia
Nu’udar Prezidente Parlamentu Nasionál, hakarak lori ha’u nia naran no Parlamentu Nasionál ni’an, hato’o parabens no feliz aniversáriu ba arte-marsiais Kmanek Oan Rai Klaran (KORK), ne’ebé selebra kada tinan, iha 12 de Abril.
Timor-Leste nu’udar Estadu Direitu e Demokrátiku, tamba ne’e sidadaun no grupu hotu-hotu iha responsabilidade morál atu kontribui ba sosiedade ida ne’ebé aberta, produtivu, justu, tolerante no dinámika. Ho bazé ba ida ne’e, nu’udar líder másimu orgaun soberanu ida, hakarak apela no dezeja ba grupu arte-marsiais KORK no grupu arte-marsiais sira seluk atu hakruk ba lei sira ne’ebé PN aprova, husu atu kontribui nafatin ba paz, estabilidade seguransa no kumpre nafatin protokolu Covid-19. Parlamentu Nasionál sei ezerse nia dever polítiku no morál atu halo esforsu hotu-hotu, fó importánsia ba pákote lejislativa relevante sira seluk, ne’ebé sei kontribui hodi dinamiza liu-tan grupu arte-marsiais sira, hodi iha koordenasaun di’ak liu ho governu, estruturadu no organizadu no ida ne’e sei permite no loke dalan ba membru arte-marsiais sira atu utiliza sira nia potensialidade no abilidade tomak ho baze orientadu ba atividade desportivas iha nivél nasionál, rejionál no mundiál. Ho forma ou dalan ida ne’e mak, ita bele hetan konfiansa totál husi sosiedade ba grupu arte-marsiais hotu-hotu ne’ebé kontribui ativamente no direta ba dezenvolvimentu área desportivas iha Timor-Leste.
Hanesan Prezidente Parlamentu Nasionál, aproveita oportunidade ida ne’e, atu manifesta ha’u nia laran-haksolok no hakarak kongratula líder grupu arte-marsiais sira hotu, inklui KORK ba sira nia membru nia
partisipasaun no kontribuisaun direta hodi servisu hamutuk “halo limpeza iha sidade Dili”, depoizde inundasaun iha Domingu, dia 4 de Abril, asaun ne’e demonstra imi nia jestu solidariedade iha situasaun krítiku ne’ebé ita nia nasaun hasoru. Iha momentu dífisil no krusiál sira hanesan ne’e, ita nia rai-lulik bolu ita hotu atu hamutuk, hases tiha ita nia kór grupu saidá de’it, kontinua unidade no oinsá tulun ita nia maluk sira ne’ebé lakon sira nia família, hela-fatin no sasan. Dala ida tan, nu’udar Prezidente Parlamentu Nasionál louva tebes inisiativa sira hanesan ne’e. Ita hotu he’in katak, ambiente servisu hamutuk entre grupu arte-marsiais sira, sei kontinua buras no forte liu-tan iha futuru.
Molok termina, ha’u hakarak apela ba grupu arte-marsiais hotu-hotu, inklui KORK ne’ebé nia membru sira maiorparte jovens ho idade produtivu, atu apoia polítika governu iha área dezenvolvimentu desportivas, liu-liu servisu hamutuk entre grupu arte-marsiais, SEJD no Parlamentu Nasionál atu haree nesesidade lejislativa ne’ebé seidauk kompleta no presiza aborda ho klean atu konsidera aspetu hotu-hotu ho komprensivu ne’ebé akomoda espetativa sosiedade ni’an ba dezenvolvimentu grupu arte-marsiais iha Timor-Leste.
Ikus liu, ha’u dezeja susesu ba Grupu Arte-marsiais KORK ba imi nia loron-espesiál ida ne’e.
Hakuak-Boot.
Dr. Aniceto Longuinhos Guterres Lopes,
Prezidente Parlamentu Nasionál.
