Pagina Inicial»Noticia
Deputado sira liu hussi sessão plenária iha loron 8 fulan março tinan 2021, preocupa makas ba caso Covid-19 ne’ebé aumenta makas no hahú da’et ona too capital Díli no município seluk.
Implementação Estado Emergência ba dala 11º, halo cerca sanitária ba Município Covalima ne’ebe iha ona transmissão local ba caso covid-19, maibé iha semana ida-ne’e hahú ona mossu caso covid-19 iha Município Baucau no agora daudaun mossu tan ona iha capital Díli.
Tanba ne’e, liu hussi sessão plenária Deputado sira hussu ba Governo no entidade hotu-hotu atu continua mantem no implementa medida hirak ne’ebé Organização Saúde Mundial no Ministério Saúde introduz atu combate covid-19.
Iha sessão plenária ne’e mós bancada parlamentar sira hato’o declaração politica hanessan; Bancada KHUNTO ne’ebe apresenta hussi Chefe Bancada KHUNTO Deputada Olinda Guterres, ko’alia kona-ba acusação hassoru Ministério dos Transportes e Comunicações, liga ba decisão atu halo contrato ró hodi substitui ró Nakroma; Bancada CNRT ne’ebé apresenta hussi Deputado Gabriel Soares, ko’alia kona-ba governante balun ne’ebé tenta privatiza instituição estado nian hodi halo acusação ba nia cidadão rassik no declaração politica seluk hussi Grupo ne’ebé apresenta hussi Presidente GMPTL, Deputada Lídia Norberta dos Santos Martins no Deputada Elvina Sousa Carvalho, ko’alia kona-ba loron internacional feto no caso violação hassoru feto no incesto ne’ebé foin lalais acontece.
Entretanto iha intervenção diversa nian, Deputado sira alem de fó parabéns ba feto Timor-Leste ne’ebé comemora loron internacional feto, sugere mós ba Governo atu melhoria nafatin distribuição cesta básica ba comunidade sira inclui distribuição necessidade básica ba comunidade sira, no assunto sira seluk.
Hatán ba preocupação sira, Secretário Estado Comunicação Social, Mericio Juvinal dos Reis Akara, hatete, relaciona ho infraestrutura Posto Polícia Nacional Timor-Leste (PNTL), processo técnico sira lao hela iha ona desenho, no seu colabora ho Ministério Obras Públicas no ADN depois sei loke ba tender público; liga ba covid-19, Governo hakarak dehan ba ema hotu-hotu, katak Conselho Ministro encontro hela, discute hela medidas saída mak Governo sei usa no iha tempo badak sei declara ba público kona-ba medidas sira ne’ebé foti, no informação seluk sei nafatin hato’o ba ministério competente hodi buka solução.
Iha sessão plenária ne’e Mesa Parlamento Nacional baixa ba Comissão A Projeto de Lei n.o 19/V(3ª) – Organização Judiciária, da Projeto de Lei n.o 23/V (3ª) – Que aproa o Estatuto do Ministério Público, da Proposta de Lei n.o 24/V(3ª) – Estatuto do Ministério Público e da Proposta de Lei n.o 28/V (3ª) – Organização e Funcionamento dos Tribunais.
Sessão plenária ne’e preside Vice-Presidente Parlamento Nacional, Luis Roberto da Silva, acompanha hussi membro Mesa sira, no hetan presença hussi Secretário de Estado para a Comunicação Social, Merício Juvinal dos Reis “Akara”.
