Pagina Inicial»Noticia
Parlamento Nacional liu hussi Sessão Plenária ordinária, iha loron 01 fulan março tinan 2021, autoriza Presidente da República, Francisco Guterres «Lu-Olo», hodi decreta Estado Emergência ba dala 11º hahú iha loron 4 fulan março 00:00 horas too loron 2 fulan abril tinan 2021, 23:59 horas.
Discussão ba renovação Estado Emergência ne’e hahú ho execução Hino Nacional, hafoin continua ho leitura guião no mensagem hussi Presidente da República kona-ba renovação Estado Emergência refere.
Hussi mensagem ne’e, além de ko’alia kona-ba razão seluk atu Estado contínua implementa Estado Emergência, ko’alia liu kona-ba numero caso infeção SARS-CoV-2 iha nação vizinho ne’ebé contínua aumenta, liuliu iha República Indonésia nomos iha Timor Leste rassik no mós caso transmissão local ne’ebe hahú ona iha Município Covalima Aldeia Fatumea.
Tanba ne’e importante tebes Estado Timor-Leste continua implementa Estado Emergência nune’e Governo bele controla no previne di’ak liu tan moras refere.
Entretanto medida sira mantem compara ho estado emergência anterior, no contínua concentra makas liu iha área fronteira sira liuliu fronteira terrestre.
Deputado sira contínua hussu ba Governo atu halo controlo máximo ba fronteira hodi previne movimento ilegal; Passaporte no KITAS ba estudante timoroan iha estrangeiros ne’ebé expire ona; apoio necessidade básico ba Comunidade sira iha Município sira ne’ebé hetan lockdown total; Comunidade sira ne’ebé tama sai Município Covalima obrigatoriamente tama quarentena 14 dias no hussu Ministério Saúde atu continua socializa no halo prevenção ne’ebé máximo iha território tomak.
Autorização ba declaração Estado Emergência ne’e ho forma lei, ho nune’e, liu hussi discussão naruk, Deputado sira liu hussi votação nominal aprova Projeto de Resolução nº 24/2021- autorização da Declaração Estado de Emergência, ho 53 a favor, 0 contra no 12 abstenções. Nune’e autoriza Chefe Estado hodi decreta Estado Emergência ba dala 11º.
Sessão plenária ne’e preside hussi Presidente Parlamento Nacional, Aniceto Longuinhos Guterres Lopes, acompanha hussi membro da Mesa sira no hetan presença hussi Primeiro-Ministro, Taur Matan Ruak hamutuk ho membro Governo sira seluk, no mós, equipa sala de situação.
