Presidente Parlamento Nacional, Aniceto Longuinhos Guterres Lopes, halo reunião ho Procurador-Geral da Republica, José da Costa Ximenes, iha Gabinete Presidente Parlamento Nacional nian, iha loron 25 fulan fevereiro tinan 2021.
Depois encontro, Procurador-Geral da República, ba jornalista sira hatete, objetivo hussi reunião ne’e atu convida Presidente Parlamento Nacional ba inaugura Edifício Procuradoria Distrital iha Município Lautem, Lospalos. Obra ne’e rassik tama iha jurisdição Distrital Baucau nian no tuir plano sei inaugura iha fulan abril tinan ida ne’e. Tinan barak Município Lautem, Lospalos, hussi Posto Administrativo to’o iha Suco no Aldeia, quando atu hetan processo ou julgamento ruma tenki ba to’o iha Baucau. Tamba nee, Procuradoria-Geral da República hodi decide harii obra ida ne’e, hodi tulun comunidade sira iha Município Lospalos.
Procurador mos informa liu tan kona-ba apresentação relatório hussi procuradoria-Geral da Republica ba Parlamento Nacional, tinan ida nee Procurador completa mandato ba tinan haat (4), no iha fulan abril sei hato’o relatório mai Parlamento Nacional.
Além de ne’e, Procurador mos informa katak, iha mos discussão kona-ba legislação balun, hanesan, uluk projeito de lei ida Ministério Público mak prepara iha tinan 2015, koalia kona-ba recuperação ativos e administração de bens.
