Pagina Inicial»Noticia
Embaixadora Malásia iha Timor-Leste, Sarimah Akbar, ho nia equipa halo reunião ho Presidente Parlamento Nacional, Aniceto Longuinhos Guterres Lopes, iha gabinete Presidente nian iha loron 11 fulan fevereiro tinan 2021.
Reunião ne’e ho objetivo atu reforça relação bilateral entre nação rua liuliu promove diplomacia parlamentar entre Timor-Leste ho Malásia.
Embaixadora Malásia hatete, Governo Malásia iha cometimento atu apoia desenvolvimento Timor-Leste liuliu iha área capacitação recurso humano.
Apoio no cooperação hirak ne’ebé Malásia halo hahú kedas bainhira Timor-Leste hetan independência too agora no contínua ba futuro tuir necessidade ne’ebé mak iha.
Presidente Parlamento Nacional agradece ba apoio no cooperação Malásia nian mai Timor-Leste durante ne’e, no hussu atu continua ba futuro. Momento ida-ne’e importante tebes apoia Malásia nian ba adesão Timor-Leste ba ASEAN.
Ba Parlamento Nacional, Presidente Parlamento Nacional hussu atu reforça cooperação interparlamentar liuliu iha assistência técnica.
