Pagina Inicial»Noticia
Presidente Parlamento Nacional, Aniceto Longuinhos Guterres Lopes, iha loron 10 fulan fevereiro tinan 2021, fó posse ba Presidente do Conselho de Imprensa (CI), Virgílio da Silva Guterres, ho nia membro sira hanessan Otelio Ote, Expedito Dias Ximenes, Francisco B. S da Costa no Benevides Correia Barros, ho nia mandato tinan 4 hahú tinan 2021 too 2025.
Presidente Parlamento Nacional iha discurso hatete Conselho de Imprensa iha papel importante iha processo desenvolvimento nacional, liuliu iha contexto garante liberdade imprensa no liberdade expressão.
Nune’e Governo iha responsabilidade hodi cria condição ba órgão comunicação sira hodi exerce nia papel ho profissional. Parlamento Nacional mós esforço cria condição nune’e iha tempo badak sei inaugura Uma Komunikasaun atu jornalista sira bele iha espaço no contribui di’ak liu tan ba atividade cobertura iha Parlamento Nacional.
Presidente Parlamento Nacional mós hussu atu Conselho de Imprensa apresenta nia relatório anual ba Parlamento Nacional tuir lei haruka.
Entretanto Presidente Conselho Imprensa, Virgílio da Silva Guterres, hatete Conselho Imprensa iha papel atu promove liberdade expressão no liberdade imprensa. Promove independência ba meio comunicação social, assegura acesso jornalista sira hala’o sira nia atividade jornalística, promove no assegura qualidade profissão jornalística nian.
Iha mandato dahuluk CI dahuluk nian concentra makas ba criação infraestrutura no recurso humano, nune’e iha mandato daruak ne’e concentra ba qualidade no desenvolvimento atividade jornalística nian.
Papel hirak ne’e, CI continua assegura atu atingi objetivo fundamental ida povo livre terra livre, no CI consciente ho desafio hirak tuir mai continua sai motivação atu desenvolve di’ak liu tan.
Cerimonia tomada de posse ne’ebé hala’o iha arredor Parlamento Nacional ne’e hetan presença hussi membro Mesa sira, Líder Bancada sira, Secretário de Estado para a Comunicação Social, no Provedoria dos Direitos Humanos e Justiça inclui convidado sira seluk.
