Pagina Inicial»Noticia
Grupo Mulheres Parlamentares Timor-Leste (GMPTL), liu hussi sessão plenária ordinário iha loron 08 fulan fevereiro tinan 2021 hato’o declaração política relaciona ato violência ne’ebé acontece iha Díli. GMPTL declara hakribi violência no condena maka’as ato violência hussi suspeito sira hassoru feto no labarik feto sira. Declaração politica ne’e hato’o hussi Vice-Presidente Parlamento Nacional, Deputada Maria Angelina Lopes Sarmento.
Além de ne’e, iha mós apresentação relatório no parecer hussi visita fiscalização Comissão C ne’ebé trata assunto Finanças Públicas ba Município sira mak hanessan Manatuto, Baucau, Ainaro no Manufahi. Relatório sira ne’e lê direta hussi relatora, Deputada Nélia Soares Menezes, acompanha hussi Vice-Presidente Comissão C, Deputada Rosalina Ximenes. Relatórios sira ne’e, relata kona-ba realidade ka fatos hirak ne’ebé comissão deteta durante fiscalização.
Iha intervenção diversa, Deputado sira continua apresenta preocupação relaciona ho problema sira ne’ebé mak acontece, mak hanessan, processo KITAS (Kartu Izin Tinggal Sementara) ba estudante sira iha estrangeiro; lista admitido estudante foun iha UNTL; Pagamento idoso sira ne’ebé atrasa; População maioria seidauk simu apoio cesta básica; no mos problema necessidade básico povo nian liuliu menos bee-moos, estrada, eletricidade iha área rural, inclui preocupação importante sira seluk hodi Governo bele responde.
Ministro dos Assuntos Parlamentares e Comunicação, Francisco Martins da Costa Pereira Jerónimo, hatete sei encaminha preocupação sira hotu ba Ministério relevante hodi resolve no relaciona ho preocupação anterior hussi Deputado sira, Governo liu hussi Ministério relevante sira, hato’o ona resposta por escrita mai Mesa Parlamento Nacional.
Entretanto iha período da ordem do dia nian, Deputado sira halo aprovação ba Proposta de Lei n.o 15/V(2ª) – Autorização Legislativa sobre as Bases Gerais da Organização da Administração Pública, iha generalidade ho votos 37 a favor, 11 contra no 12 abstenções.
Sessão plenária ne’e preside hussi Presidente Parlamento Nacional Aniceto Longuinhos Guterres Lopes, acompanha hussi membro da Mesa sira no hetan presença hussi Ministro da Presidência do Conselho de Ministros, Fidelis Manuel Leite Magalhães, Ministro dos Assuntos Parlamentares e Comunicação, Francisco Martins da Costa Pereira Jerónimo no Presidente da Comissão Função Publica, Faustino Cardoso Gomes.
