Pagina Inicial»Noticia
Parlamento Nacional, liu hussi Comissão F ne’ebe trata assunto Saúde, Segurança Social e Igualdade Género, lidera hussi Presidente Comissão, Deputado Noé da Silva Ximenes “Buka Tuir”, acompanha hussi membros Comissão sira, halo fiscalização iha Município Viqueque iha loron 20 fulan janeiro tinan 2021.
Tuir intervista ho Presidente Comissão F katak, iha tinan 2021 ne’e primeira atividades fiscalização hahú iha Município Viqueque ho Objetivo atu hare liu kona-ba prosesu atendimento no condições real servisu iha Centro de Saúde no posto saúde sira, hodi bele hatene informação atu nune bele relata ba Ministerio Saude.
Fiscalização ne’e hahú ho reunião ho Administrador Município Viqueque, Sr. Januario Soares Pereira ho nia ekipa, representante Saude iha Municipio Viqueque, reprezentante husi MSSI, representante husi Veteranu ho seluk tan.
Tuir informasaun husi reprezentante Diretor Saude iha Municipio Viqueque, katak iha Município Viqueque iha Ambulância neen (6) maibé ambulância rua ne’ebe cobre iha posto administrativo Watulari ho Uatucarbau condição aat, presisa Ministerio Saude halo manutenção.
Iha Município Viqueque Problema mak edifício ba Centro Saúde, to agora continua uza edifício ne’ebe mak uluk construi hussi indonésia, maibé, condição edifício refere la di’ak. Maibé, informação geral iha parte infraestruturas ba centro saúde no posto sira kuaze 70% condição diak, Sentru Saude iha Postu Administrativo Ossu Sai referencia diak ba postu Administrativo neen nulu resin haat (64), só iha posto Saúde balun mak precisa tau atenção maka’as, exemplo mak Posto Saúde Louhuno, Comissão F sei halo relatori no recomenda ba Ministerio Saude atu tau atenção.
Representante hussi parte Ministério Solidariedade Social e Inclusão (MSSI), hussu atu halo manutenção ba kareta operacional iha Município Viqueque, no problema seluk mak ossan ba idoso sira, dala ruma ferik katuas sira atu ba simu osan maibe naran iha sistema la deteta, ida ne’e sai problema ba MSSI nia serviço.
Veteranos sira questiona kona-ba labarik sira ne’ebé hamutuk ho nia inan aman desterra ba Atauro, no balun hakotu nia vida iha tempo ne’ebá considera hanessan mártires ka lae, no sira ne’ebe mak moris considera hanessan veteranos ka lae; ida ne’e mak sai duvida boot iha processo recolha dados veteranos nian.
Relaciona ho preocupação sira ne’e hotu, Comissão sei relata iha sira nia relatório no pareceres, hodi hussu ba ministério competente hodi resolve.
