Iha loron 18 fulan agosto tinan 2015, Parlamento Nacional halo Sessão Solene hodi fó homenagem ba Sr. Deputado José da Silva Panão «Folaran», ne’ebé hakotu iis iha hospital Waloyu Jakarta bainhira hala’o serviço iha Jakarta Indonésia iha loron 16 fulan agosto tinan 2015.
Antes hala’o sessão Solene, Parlamento Nacional liu hussi Comissão Permanente aprova voto de pesar no 12/2015 ho unanimidade 19 voto a favor, contra 0 no abstenção 0.
Deputado José da Silva Panão «Folaran» moris iha Ossu município Viqueque, envolve makas iha resistência nacional durante okupasaun Indonésia.
Iha tinan 2001 eleito sai Deputado iha Assembleia Constituinte hussi Partido Democrático. No eleito hikas nu’udar Deputado iha tinan 2012 hussi bancada partido CNRT no assume cargo hanessan Vice-Presidente ba Comissão Especializada kona-ba Infraestrutura, Transportes no Komunikasaun.
Bancada Parlamentar sira; CNRT, FRETILIN, PD no FM, ida-idak liu hussi chefe bancada fó liafuan ikus ba matebian Deputado José da Silva Panão «Folaran» hodi expressa lala’ok no kontribuisaun tomak ne’ebé Deputado ne’e halo ba povo Timor-Leste liuliu ba Parlamento Nacional rassik.
