Pagina Inicial»Noticia
Parlamento Nacional iha loron 9 fulan dezembro tinan 2020, continua halo discussão ba Proposta de Lei n.o 23/V(3º) – Orçamento Geral do Estado para 2021, iha especialidade.
Antes hahú debate, Presidente Parlamento Nacional lori naran Parlamento Nacional fó parabéns ba Arquidiocese Díli, ne’ebe celebra nia aniversario ba existência tinan 80 no continua fó kedas tempo ba Primeiro-Ministro, Taur Matan Ruak hodi fó resposta relaciona ho proposta alteração ne’ebé Deputado sira apresenta.
Primeiro-Ministro ho Ministro das Finanças clarifica katak hussi proposta hirak ne’ebé Deputado sira apresenta dificulta Governo atu gere fundo contingência ho possibilidade sei altera mós programa hirak ne’ebé Governo decide ona.
Ho nune’e, maioria proponente ba proposta hirak ne’e decide retira hirak proposta no reserva ba futuro karik iha orçamento retificativo sei fó prioridade ba assunto hirak ne’e.
Liu hussi discussão naruk, Deputado sira consegue aprova orçamento ba Dotação para todo o Governo ho montante $228.533.000; Ministério dos Negócios Estrangeiros e Cooperação ho montante $26.738.000; Ministério da Justiça ho montante $15.523.000; Ministério da Administração Estatal ho montante $49.342.000; Ministério da Saúde ho montante $58.848.000.
Hussi aprovação hirak ne’e, sei iha alteração ba montante balun iha proposta original ba Ministério sira relaciona ho aprovação ba proposta alteração sira ne’ebé apresenta hussi Deputado sira.
Antes termina debate, Presidente Parlamento Nacional fó mós parabéns ba Partido Libertação Popular (PLP) ne’ebe celebra nia existência iha loron 9 fulan dezembro.
Debate ne’e hotu iha horas 18h07 no discussão especialidade ne’e sei contínua iha loron 10 fulan dezembro tinan 2020, hodi continua ba ministério hirak ne’ebé seidauk hetan aprovação.
Sessão Plenária ne’e preside hussi Presidente Parlamento Nacional, Aniceto Longuinhos Guterres Lopes, acompanha hussi membro Mesa sira no marca presença hussi Primeiro-Ministro, Taur Matan Ruak, acompanha ho nia membro Governo sira.
