Mensagem Presidente Parlamento Nacional Dr. Aniceto Longuinhos Guterres Lopes Ba Selebrasaun Loron Mundial Difisiente sira

Pagina Inicial»Noticia

Mensagem Presidente Parlamento Nacional

Dr. Aniceto Longuinhos Guterres Lopes

Ba Selebrasaun Loron Mundial Difisiente sira

Organização Nações Unidas (ONU), desidi ona loron 3 fulan Dezembro iha tinan 1992 nu’udar loron mundial ba deficiente sira. Liu tiha decisão ida-ne’e país ida-idak celebra loron ida-ne’e ho atenção especial ba maluk difisiente sira iha mundo tomak inclui iha Timor-Leste.

Timor-Leste nia atenção ba cidadão sira ne’ebe sofre deficiência hatudu kedas iha Constituição RDTL artigo 21 ne’ebe dehan “cidadão sira ne’ebe hetan deficiência goza direito no hakruk ba dever ne’ebe hanessan ho cidadão sira seluk, maibé sira labele halo ka kumpri obrigasaun sira ne’ebe sira nia condição deficiência la permiti sira atu hala’o. Estado tuir kbiit nebe iha, promove proteção ba cidadão sira ne’ebe sofre deficiência, tuir lei”.  Plano Estratégico Desenvolvimento 2011 -2030 Timor-Leste hatur ema iha sentru desenvolvimento nacional, nune’e mós Objetivos Desenvolvimento Sustentavel ne’ebe Timor-Leste halo parte, declara katak la hussik ema ida iha kotuk. Ita iha instrumento desenvolvimento rua ne’ebe  tau ema hotu-hotu inclui maluk sira ne’ebe sofre deficiência mós iha conceito ida-ne’e.

“Ema mak centro desenvolvimento no la iha ema ida hela iha kotuk”, ne’e katak ema hotu-hotu hetan oportunidade hanessan ba sai beneficiado hussi desenvolvimento no sai autor ka promotor ba dezenvolvimentu. Sentido principal hussi desenvolvimento mak hussi ema ba ema hotu-hotu no ba natureza nebe fó moris ba ema.

Obrigasaun moral, constitucional no legal sira bolu atenção mai ita hotu atu labele discrimina, exclui no impede maluk deficiente sira iha relacionamento social, iha atividade politica no económica, no iha desenvolvimento setor hotu-hotu.

Além de constituição, PEDN, ODS, Timor-Leste iha ona Politica Nacional inclusão no promoção direitos deficiente sira (Res. no.14/2012), ho objetivos atu:

1. Promove igualdade oportunidade no participação ativa maluk sira ne’ebe sofre deficiência iha desenvolvimento sociedade Timor-Leste;
2. Defini area intervenção no estrategia ba prevenção, tratamento, reabilitação no integração sira ne’ebe sofre defisiencia iha sociedade;
3. Cria mecanismo coordenação no articulação entre setor publico, privadu no sociedade sivil hodi halo monitorização no avaliação ba implementação estrategias ne’ebe relaciona ho maluk deficiente sira.

Nu’udar Presidente Parlamento Nacional ha’u hakarak bolu tan atenção ba parte hotu-hotu ne’ebe interven iha area ida-ne’e, inclui Deputado sira, atu promove no articula di’ak liu tan pratica coordenação no colaboração hodi reforça maluk deficiente sira iha centro desenvolvimento nacional no sai nu’udar promotor mós iha desenvolvimento. Mai ita tau hamutuk esforços ho ação concreta atu habiit no inclui nafatin sira iha desenvolvimento setor hotu-hotu.

Parabéns ba maluk deficiente sira hotu iha Timor-Leste tomak.